La Vega per dientro

Interior de la fábrica d'armes de La Vega. Foto: José Francisco Sánchez Díaz.
Interior de la fábrica d'armes de La Vega. Foto: José Francisco Sánchez Díaz.

Les ciudaes tienen sitios secretos onde nun dexen pasar. Propiedaes privaes, por exemplo, patios y xardinos, torres de catedrales, y tamién dellos espacios públicos, que son de toos, pero que tán zarraos. Eso pasa cola fábrica d’Armes d’Uviéu. Un espaciu conocíu pa los miles de trabayadores que ganaron el xornal nella y desconocíu pa los demás.

Naves y pabellones tan antiguos en pie y bien conservaos queden pocos. Si-y amestamos que, parte, foi un monesteriu con restos románicos, y que debaxo puen tar enterraos los cimientos d’un palaciu de los reis asturianos, fai qu’apeteza entrar na Vega y vela. Tol mundu nun tuvo esa oportunidá. Esperamos que, bien ceo, la fábrica sía un cachu d’Uviéu pa pasiase, trabayar o divertise. Lo que ye de toos tenemos que poder usalo toos y da-y una vida nueva, conservando y creando espacios.

Eso ye futuru, mirar polo nuestro, pola identidá d’una ciudá defendiéndola de los que namás quieren destruir y construir porque vienden o carreten cemento.

La guapísima galería de semeyes de José Francisco Sánchez Díaz que compartimos, enséñanos un poco de La Vega. Esti fotógrafu ta interesáu tamién pol paisaxe asturianu, pola fotografía industrial y cultural. Convidámosvos a ver los trabayos d’él na so páxina web.

Be the first to comment

Leave a Reply

Tu dirección de correo no será publicada.


*