L’ampliación del Museu de Belles Artes d’Asturies

Museo bbaa ampliacion. Foto: Suárez.

En marzu del 2015 estrenóse l’ampliación del Muséu de Belles Artes d’Asturies, que diseñó l’arquitectu navarru Patxi Mangado. Esti edificiu correspuende a la denominada Fase I del proyectu y ta dedicada a enseñar los fondos d’arte contemporaneu. Llevántase nel espaciu qu’ocuparen cinco inmuebles asitiaos nos númberos 10 (Casa de los Solís-Carbajal, s. XVII), 12 (Casa de los Omaña, s. XVI), 14 y 16 de la cai la Rúa y nel númberu 1 de la plaza d’Alfonso II el Castu –la plaza la catedral– (finales del sieglu XIX – primeros del XX), que, a poco y a poco, foi obtenendo’l Gobiernu asturianu por compra, permuta y espropiación.

Nel proyectu destaquen dellos elementos. Lo primero, la fachada doble, que gana una dimensión de telón urbanu y que s’adivina pente los güecos desnudos de los edificios anteriores. Pa Mangado, esti ye un componente de gran intensidá formal, visual y funcional, onde se pue facer una llectura basada nes capes diferentes de la memoria.

Detrás atópase la escalera, que permite l’accesu a tolos niveles del Muséu. L’andar de doble y triple altura de la entrada, en diálogu coles fachaes históriques na medida que s’acerquen y separen del interior, enseñen tamién un xuegu interesante de formes y volúmenes.

Otru elementu que rescampla na ampliación son los vanos vacios, sobremanera los del llucernariu grande o patiu, espaciu de referencia nel conxuntu. Lo mesmo nesti como nos llucernarios de la planta segunda, resalta una lluz buscada. Amás, los remates d’éstos na cubierta recuerden, según l’arquitectu, a los cimborrios y capiyes de la catedral.

Be the first to comment

Leave a Reply

Tu dirección de correo no será publicada.


*