Alfonso Fanjul gana’l Fierro Botas con un trabayu sobre la cerámica de Faro

Alfonso Fanjul nuna escavación.

L’arqueólogu Alfonso Fanjul Peraza algamó anguaño’l Premiu Fierro Botas d’ensayu, que convoca la Conceyalía d’Educación y Cultura de Xixón. El títulu del trabayu gallardonáu ye Orixe y desendolcu de la cerámica de Faro y nél Fanjul describe la historia de la evolución de la producción pucherera nesti llugar del conceyu d’Uviéu al traviés de les numberoses escavaciones arqueolóxiques qu’él mesmu desenvolvió en Faro a la busca de la secuencia cultural d’esta cerámica tradicional. Estes escavaciones estendiéronse ente los años 2012 y 2013, cuando’l gobiernu autonómicu prohibió a Fanjul y al so equipu siguir escavando en testares cerámicos.

L’estudiu de Fanjul inclúi dellos materiales inéditos rellacionaos colos oríxenes de la industria pucherera de Faro; estos materiales, que s’atoparon en dellos xacimientos arqueolóxicos de la zona, señalen la dómina altomedieval como empiezu más probable d’esta actividá.

Asina, les investigaciones y pruebes permitieron al equipu de Fanjul datar ente los sieglos XI y XII el fornu qu’apaeció n’El Cantu’l Rei, una instalación que presenta una estructura mui arcaica y qu’Alfonso Fanjul considera’l primer fornu industrial de la zona especializáu na fabricación d’olles. Tanto les estructures como la calidá de les pieces cambien «radicalmente» a partir del sieglu XIV, cuando se xeneraliza’l fornu cuadrangular, que va ser el que perdure en Faro hasta anguaño.

El trabayu pasa, darréu, a repasar la producción bien potente de cerámica vidriao na Edá Moderna, enantes d’estudiar el desmantelamientu de la industria pucherera de la zona y les pieces más recientes nel tiempu, una investigación que se basó na escavación de Casa Nola, nel barriu de Los Barreros. Al final del trabayu, Fanjul incorporó un apéndiz con tolos restos conservaos, fornos y testares de la cultura cerámica de Faro, a la manera d’un catálogu de xacimientos arqueolóxicos.

Alfonso Fanjul Peraza ye doctor n’Arqueoloxía y máster en Prehistoria pola Universidá de Salamanca, y llicenciáu n’Historia pola Universidá d’Uviéu. La so especialidá investigadora son los castros asturianos, una estudiu qu’empieza nel añu 1995, cuando entra como voluntariu nes escavaciones que se taben faciendo entós na Campa Torres (Xixón). En rellación con esta materia d’estudiu tien publicaos bien de trabayos, ente los que destaquen los llibros El complejo castreño de los astures transmontanos (2004), Los castros de Asturias. Una revisión territorial y funcional (2005) y Estudios varios de arqueología castreña. A propósito de las excavaciones en los castros de Teverga (2007). Na actualidá dirixe’l proyectu arqueolóxicu d’emerxencia del castru de Podes (Gozón).

Sicasí, tien desenvuelto numberosos trabayos profesionales y d’investigación n’otros ámbitos, ente los que destaca la etnografía cerámica asturiana. Nesti terrén, vien buscando, dende l’añu 2012 y al traviés d’escavaciones arqueolóxiques en Faro (Uviéu) y L.lamas del Mouru (Cangas del Narcea), los oríxenes y la evolución de les producciones cerámiques tradicionales asturianes. Gracies al carbonu 14, consiguió precisar dataciones nueves y plantear hipótesis de trabayu sobre esta cultura material. Amás, vien dirixendo tolos branos dende’l 2012 delles escavaciones venceyaes a l’arqueoloxía de conflictos —o arqueoloxía bélica— na redolada d’Uviéu.

Be the first to comment

Leave a Reply

Tu dirección de correo no será publicada.


*