L’artista visual Nadia Penella firma’l vídeu del tema «Espiral» del grupu Sombra

Fotograma del vídeu ‘Espiral’, de Nadia Penella.
Fotograma del vídeu ‘Espiral’, de Nadia Penella.

L’artista visual, realizadora y documentalista Nadia Penella firma’l vídeu del tema «Espiral» del grupu Sombra, un trabayu sobresaliente onde desendolca’l conceptu que tien ella de la poesía visual con un aciertu mui grande. Apóyase nos reflexos d’imaxes onde s’amiesten paisaxes industriales cola fuercia de la naturaleza, nun xuegu d’espeyos mui guapu qu’acompaña que nin pintao a la música. La videocreadora sofita’l filu conductor de tol metraxe na apaición y movimientu de fumo.

Dexando ver munches veces una visión fantástica y, otres, perrealista del nuestru territoriu, Nadia Penella consigue enganchanos coles imaxes y colos xuegos de montaxe, dacuando tan hipnóticos como una espiral. Testures y colores impactantes acompañen unos elementos industriales que lleven al espectador dende unes tomes reales hasta visiones más propies de la realidá virtual del videoxuegu. La poesía de Nadia llévanos d’un mundu presente a unu futuru inmediatu, muncho más foscu, y en destrucción.

Nadia Penella ye diplomada en cine documental y la mirada d’ella como directora pósase nel montaxe poéticu de les imaxes. Amás d’esti vídeu del grupu Sombra, tien firmáu otru trabayu documental esperimental, Sinfonía de Galernas.

Sombra ye un tríu compuestu por Borja, Xuan y Miguel, que tán acabantes de sacar el primer discu, que se titula Visiones (Discos Furia, payares 2017). Nacieron n’Úviéu nel 2015 pola gana d’esplorar los sones del space rock y el prog-rock y de cariciar espresiones artístiques como les músiques del mundu con influencies del jazz. Sombra fai música heavy-psych y «Espiral» ye’l tema más intimista del discu nuevu, que lu grabaron en directu n’OVNI Estudiu, con Pablo Martínez a los mandos. El discu pue mercase en https://sombravibra.bandcamp.com y tamién pue sentise en Spotify y YouTube.

 

Be the first to comment

Leave a Reply

Tu dirección de correo no será publicada.


*