L’asociación Reciella entama la primer carrera de families pol asturianu

Ilustración de Marco Recuero pal Día de la Reciella.
Ilustración de Marco Recuero pal Día de la Reciella.

El domingu 2 d’ochobre, l’asociación Reciella organiza la primer edición d’Entaína, una carrera familiar pol asturianu, non competitiva, festiva y cola tresmisión interxeneracional del idioma como filu conductor. Esta actividá enmárcase dientro del IV Día de la Reciella, que se va celebrar, a partir de les 10:00 hores, nel Muséu del Pueblu d’Asturies, en Xixón.

La xornada va empezar cola entrega de dorsales de la I Entaína al llau de la bolera del Pueblu d’Asturies y, a les 11:00 hores, va salir la carrera. Pa les 11:30 ta prevista la llegada a meta, onde se va facer la entrega d’avituallamientu, la llectura d’un manifiestu y el sortéu de premios.

Esta carrera quier simbolizar el pasu del testigu del idioma propiu y la tresmisión de la llingua de xeneración en xeneración, un aspectu nel que l’asociación ta especialmente enfotada dende los principios. Pa tresmitir esa idea, Reciella contó esti añu cola collaboración del diseñador Marco Recuero, que ye l’autor del cartel. Pa poder participar hai qu’apuntase cubriendo’l formulariu d’inscripción que s’atopa na páxina web de l’asociación.

Tres de la carrera, el programa va siguir col xuegu, a les 12:00 hores, d’un partíu de fútbol infantil d’exhibición del U. C. Ceares, con comentarios de Nacio González. Media hora más tarde, van desenvolvese los talleres «Facemos llambiotaes», cola collaboración de Miel et Canelle, y «Facemos xuguetes con material reciclao», onde collabora la Empresa Municipal de Servicios de Mediu Ambiente Urbanu de Xixón (EMULSA). El programa matutín va acabar, a les 13:00 hores, col cuentacuentos al cargu de l’actriz Olga Cuervo.

A les 14:00 hores va facese una posa pa xintar nel chigre de la Reciella —onde se va poder consumir comida tamién vegano— y, a les 16:00 hores, van volver les actividaes con un cuentacuentos y taller alredor del llibru infantil Samalandrán. Islla de lleendes, de Víctor Raúl Pintado Rey y Niña Rata. A les 17:00 hores ta programáu’l taller «Bombes pa les nuestres amigues les abeyes», onde va aprendese a facer bombes de semientes qu’españen faciendo nacer flores.

La estaya musical va tar al cargu de la Banda infantil de gaites de Villaviciosa «El Trubiecu», con una actuación a les 17:30 hores, y los músicos de Bestiariu, que van dar un conciertu a les 18:30.

Amás, a mediudía y pela tarde va haber pintacares, rifa de productos culturales infantiles n’asturianu enantes del conciertu, una tienda de la editorial Pintar-Pintar onde poder mercar llibros y discos de temática infantil y xuvenil, xuegos tradicionales cola collaboración de la Tertulia Cultural el Garrapiellu y un photocall colos personaxes de les tires cómiques Moyando’l culu, de Ruma Barbero.

Toles actividaes del Día de la Reciella son de baldre, sacante’l pintacares, que tien un costu d’un euru. Pa esta actividá y pa los talleres, fai falta acutar plaza nel puestu de la Reciella.

Reciella contó anguaño cola collaboración de munches persones y grupos implicaos na recuperación y tresmisión del asturianu; ente ellos, la banda Skama la Rede, que grabó un videuclip del cantar «Entaína», con lletra de David Guardado y realización de Pablo Quiroga.

Be the first to comment

Leave a Reply

Tu dirección de correo no será publicada.


*