Laura Marcos, una escritora nueva y buena

Laura Marcos.
Laura Marcos.

ALBERTO SUÁREZ
Cuentos de ser y de tar ye’l primer llibru que publica Laura Marcos (Mieres, 1982). Son diez narraciones curties y bien escrites. Cuentos que llamen a querer saber más, a siguir pasando páxines. Laura Marcos ye una narradora fecha y derecha, con un ritmu narrativu constante, prestosu y con ganchu. Les histories d’esta escritora son riques y unes mamen del realismu y otres de la fantasía.

La llinia narrativa de los meyores cuentos d’esta entrega nun se sostién namás nun filu, tien per ella un cable gordu compuestu de munchos pares que tresmiten la parte descriptiva, los diálogos, la situación emocional de los personaxes, el pesu del análisis suxetivu interior contra’l pesu de la censura social y munches coses más. Porque Marcos nun cuenta sin más, cuenta d’una manera mui rica, fresca y, a la vez, con fondura. Nun cai nes consignes d’enunciáu a la hora de contar los mundos, les vides, sinón que traza les histories dende un puntu dende’l que nos dexa ver y mirar lo difentes que son les coses si nos movemos. Esi sitiu dende’l que narra, esi puntu de vista ye una novedá grande nes lletres asturianes. Amás, sabe cambiar la voz narrativa d’unos personaxes a otros perbién y consigue un avance rápidu y atractivu.

Laura Marcos ye quién a ponenos delantre de los güeyos unos cuentos naturales, de tiempos diferentes pero siempre auténticos. Fálanos de la vida hasta’l momentu mesmu de la muerte y más p’allá; domina la narración epistolar; enséñanos muyeres intelixentes dende neñes y maneres de ver la vida estremaes dientro de situaciones típiques; pon emoción y crueldá nos cuentos: y failo too con muncha mano. Ye una escritora segura, sabe lo que quier contar, ensin andar con vueltes. Les vueltes yá les tien la vida. Y tien razón.

No llinguístico, Laura Marcos demuestra ser una bona falante patrimonial d’asturianu y al lleela gózase d’una manera de ser, de falar y de contar asturiana (por desgracia munches veces, n’otros llibros recientes d’escritores con más o menos oficiu, ta perdida esta manera de facer les oraciones en beneficiu –más bien en perxuiciu– de la forma como lo fai la llingua castellana. Les llectures en castellanu tán afectando a les creaciones nueves y acabando cola oralidá y la manera de contar nuestra). Gustóme muncho la llingua qu’usa esta autora y diome muncha pena topar dalgún pronome reflexivu mal puestu o puestu onde n’asturianu nun se pon. Pal mio gustu, estos fallucos estropien la calidá d’un testu y sáquenme de la llectura. Caún tien les repunancies d’el. Pero Laura consigió volver a enganchame.

Cuentos de ser y de tar ye un bon llibru. Gustóme muncho cómo escribe Laura Marcos. Gustóme l’humor que gasten los personaxes, l’autenticidá del carácter d’ellos y creílos porque son y porque tán. Y nun toi d’alcuerdu cola escritora cuando, nos agradecimientos, diz que tien poca imaxinación, porque les histories que cuenta, o les conoció por otros, o les vió o les vivió. Al mio paecer, toles situaciones posibles, toles trames n’esencia, yá tán escrites en cualquier sitiu del mundu. Nun se trata de ser orixinal. Trátase de contalo bien. Y Laura Marcos cuéntalo mui bien. «Cleo en Cervère», «La Santa Fesoria», «Suañar en primera persona» o «Rexicidiu» son cuentos preciosos. Pienso que sería buenísimo pa la lliteratura asturiana que Laura Marcos escribiera y publicara muncho más.

Laura Marcos ye llicenciada en Filoloxía Inglesa y especialista en Filoloxía Asturiana pola Universidá d’Uviéu. Foi responsable del Serviciu de Normalización Llingüística del Conceyu de Mieres y correctora independiente de llibros n’asturianu. Agora, trabaya como docente de secundaria. Los cuentos publicaos nesti volúme ameritaron bien dellos premios en concursos lliterarios.

cuentos-de-ser-y-de-tarCuentos de ser y de tar
Laura Marcos
Ediciones Trabe, 2017
112 páxines

Be the first to comment

Leave a Reply

Tu dirección de correo no será publicada.


*