Llinaxe fortísimu

Agora que naide frañe’l gran silenciu, que los hábitos nun caricien la madera, que nel güertu medra la meruxa, agora, voi falar de Valdediós. Voi falar, como’l de Nursia, del llinaxe fortísimu de los cenobites, de los monxos cistercienses qu’en 1992 volvieron a habitar la casa de la que los echara, en 1835, la desamortización de Mendizábal; de los mesmos monxos a los que volvió echar, 174 años depués, non un ministru lliberal, sinón la voluntá d’un arzobispu d’Uviéu, un abá xeneral del Císter y un cardenal prefectu.
La primer vez que m’agospedé nel monesteriu de Valdediós foi en xunetu del 2001. Dende entós, y hasta’l 2009, avecéme a pasar una selmana al añu na hospedería interna, dientro de la zona de clausura de los monxos cistercienses. Seique esta sía una de les característiques que facíen de Valdediós un sitiu distintu a otros monesterios, onde los güéspedes suelen agospedase fuera de la clausura. Nel cenobiu asturianu, non, la vida del güéspede podía ser, per unos díes, idéntica a la del monxu. Espertar de nueche p’asistir a maitines a les seis y cuartu, volver al coru al amanecer pa cantar laudes, almorzar na antecocina aquel café prestoso onde lo hubiera… Pero, sobre manera, agradecíase’l contactu directu cola comunidá, con unos homes que, en cuenta del hermetismu que podíen tresmitir les muries del edificiu, taben abiertos a la realidá del mundu, conscientes de los problemes de los que vivíemos más allá de la tapia.
Esta apertura foi la que me permitió garrar confianza, añu a añu, colos monxos y que, nel 2006, m’atreviera a propone-y al padre Jorge Gibert, el prior, facer un reportaxe fotográficu sobre la vida nel monesteriu. A pesar de la confianza que suponía aquel permisu, la primer sesión, en xineru d’aquel añu, supunxo un retu profesional y personal de primer nivel. La mio actividá nesos díes nun diba ser mui distinta de la de les selmanes anteriores y yo mesmu nun yera yá un estrañu na ilesia, la cocina, el claustru, el taller o’l refectoriu, pero había un elementu nuevu y, seique, intimidatoriu: la cámara de fotos, que m’obligaba a facer unos xestos que nun yeren los propios del rezu a comuña y que facía unos ruíos que rinchaben –non pol volume, sinón polo fuera de sitiu– ente los soníos cotidianos a la hora de comer.
Depués de revelar aquelles primeres fotografíes, decateme de lo lloñe que taba de captar y poder tresmitir la vida monástica tal como quería, tal como la vivía cada vez que trespasaba el portón de madera y entraba na celda tres de xubir les escaleres y arrodiar el primer pisu del claustru.
A últimos del 2006 fixi otra sesión de trabayu, onde pudi afinar un pocoñín más la técnica y, sobre manera, averame a los monxos con un oxetu que, a eses altures, nun yera yá tan raru. Sicasí, naquellos meses produciérase l’abandonu d’ún de los miembros de la comunidá, un abandonu que diba resultar tresdendental pal futuru del monesteriu.

Be the first to comment

Leave a Reply

Tu dirección de correo no será publicada.


*