Llinia clara pa entrar nel Misteriu

Claudio Pastro.
Claudio Pastro.

HENRIQUE G. FACURIELLA
Hai un añu, el 19 d’ochobre de 2016, morría en São Paulo (Brasil) Claudio Pastro (1948-2016), quiciás l’artista brasileñu más importante de tolos que se dedicaron al arte sacro y, ensin dulda nenguna, una de les referencies mundiales nesti terrén artísticu. Anque laicu, Pastro tuvo siempre mui venceyáu a la espiritualidá monástica benedictina, una vinculación que se nota non solo na temática de la so obra plástica, sinón, sobre too, na so manera de facer y d’afondar nel mensaxe que les sos pieces teníen que tresmitir. Asina, la práctica de la lectio divina —una llectura meditada y orante de les escritures sagraes mui propia de los monxos y monxes que siguen la regla de San Benito— taba siempre nel principiu de cualquier procesu creativu al que s’enfrentaba.

Otra de les llinies guía del so facer artísticu foi’l Conciliu Vaticanu II (1962-1965) y los documentos que salieron d’él, especialmente la Constitución Sacrosantum Concilium, sobre la lliturxa. Ente los mandaos d’esti documentu pa tola Ilesia católica, alcuéntrase’l del exerciciu llibre del arte contemporáneo, «con tal de que sirva a los edificios y ritos sagraos col honor y la reverencia debíos», y recomienda a los obispos y otros responsables xerárquicos que, «al promover y favorecer un arte auténticamente sacro, busquen más una guapura noble que la pura suntuosidá». Les creaciones de Pastro pa ilesies, monesterios y catedrales siguen, puntu a puntu, estes indicaciones del conciliu ecuménicu y, nelles, la simplicidá de les formes y la economía de medios nun son obstáculu pa la comunicación de lo sagrao, sinon tolo contrario, «un convite pa entrar nel Misteriu, no que ta más allá de les figures y los colores», en palabres del mesmu artista.

Él yera mui consciente de que la imaxe, más que la palabra escrita, ye «l’únicu llinguaxe universal del home y de lo sagrao», y considérala «el llinguaxe amorosu que’l Creador escoyó pa comunicase». Esta concepción trascendente de la imaxe ye lo que fai que la contemplación de les sos figures nun quede nel puru gociu estéticu, sinón que, dende una actitú creyente o simplemente abierta, al espectador se-y abra la percepción d’una realidá que ta más allá de la materialidá qu’entra pelos güeyos, que permita’l contactu con una presencia que ta más allá d’él mesmu.

La obra de Pastro, amás, abarca toles artes plástiques y decoratives, de la pintura a la escultura, pasando pela ilustración, la orfebrería, el textil y hasta’l diseñu de los espacios sagraos. Nesti sen, puede considerase un artista total, qu’abarca, na so concepción, tolos elementos materiales que s’usen pa poner a los fieles en rellación con Dios, sía na oración personal, sía nel cultu públicu y solemne.

Parroquia de Santa Teresina del Neñu Xesús, Florianópolis.
Parroquia de Santa Teresina del Neñu Xesús, Florianópolis.

Quiciás la obra más conocida de Pastro sía la decoración del santuariu nacional d’Aparecida, el llugar de cultu más importante de Brasil, sicasí, préstame aparar nuna obra considerada, quiciás, de menor envergadura, pero qu’espeya mui bien esta idea de somorguiar a la persona que participa na acción cultual dientro d’un espaciu sagráu y de rellación cola divinidá: la ilesia parroquial de Santa Teresina del Neñu Xesús, en Florianópolis (Santa Catarina, Brasil). Equí, en cuenta de concentrar los polos celebrativos —sé, ambón y altar— nuna disposición basilical —nave (pa los fieles) y ábside (pa los ministros)—, Pastro colócalos nuna especie de pasillu (via sacra) nel mediu del espaciu, coles files de bancos mirando hacia él dende los dos llaos, de manera que, nel mediu de too quede l’altar; al fondu, la sé del sacerdote, y, a los pies, l’ambón, d’au se proclamen les llectures. Pero ye que, amás, l’ambón ta conectáu, al traviés del pie del ciriu pascual, cola fonte bautismal, no que supón un siguimientu fiel, al mesmu tiempu qu’innovador, de la norma llitúrxica, qu’establez que, nel tiempu de Pascua, el ciriu tea xunto al ambón y, el restu del añu, al par de la pila bautismal.

Esti empléu intelixente y fondu de los símbolos ye otra de les característiques de tola obra de Claudio Pastro, que supo aprovechar na so creación tola potencia comunicativa d’elementos simbólicos como la lluz, l’agua o l’olivar, dándo-yos un tratamientu que los fixere significativos pa los homes y les muyeres d’anguaño.

Anunciación. Claudio Pastro.
Anunciación. Claudio Pastro.

Be the first to comment

Leave a Reply

Tu dirección de correo no será publicada.


*