Los ‘Alcuentros cola tradición’ de Vezos Astures: diez años desfaciendo fronteres

Vezos astures

El sábadu 4 de payares, nel Tendayu del Pueblu d’Asturies, van dase, nel marcu de los Alcuentros cola tradición, siete hores de talleres de baldre con bailles de Galicia, Llión, Zamora, Cantabria, País Vascu, Aragón y Albacete. Los Alcuentros cola Tradición de Vezos Astures nacieron cola idea de facer un intercambiu cultural cola tradición d’otres partes del Estáu, pa que pudiera ponese en común cola nuestra. Y porque conocer otres tradiciones, otres músiques, otres maneres de baillar ye la meyor manera de valorar la tradición asturiana y, al tiempu, arriquecela.

La xente de Vezos Astures, en cuenta de facer esi intercambiu cultural con un grupu de baille de fuera d’Asturies en forma d’actuación nun escenariu, decidieron facelu en forma de taller de baille, de manera tala que los integrantes del grupu convidáu deprendieren a los de Vezos –y a los d’otros grupos asturianos– los bailles populares de la zona d’ellos. Esti añu, al cumplir una década, los Alcuentros van cellebrase per too lo alto y, en cuenta de convidar a un grupu pa facer un taller, tán convidaos siete, que van facer una maratón de siete hores de talleres de baille tradicional.

Los Alcuentros de Vezos tán abiertos a la participación de toles persones interesaes n’aprender a baillar, tengan o non conocimientos de baille. Los talleres son de baldre y nun fai falta inscribise primero. Esti añu van ser nel Tendayu del Muséu del Pueblu d’Asturies, en Xixón, el día 4 de payares, pela mañana y de tarde. Como los Alcuentros cumplen una década, anguaño la xente de Vezos convidó a repetir taller a tolos grupos que vinieren otros años y que son de los más destacaos del so territoriu. El programa ye’l siguiente:

10:45 hores. Colectivo Brañaflor, Cantabria.
Iguao por un grupu de persones interesaes nes tradiciones que recueyen músiques, lletres, bailles y ritos de Cantabria.

11:45 hores. Aiko Taldea, Bilbao.
Son mayestros de música y danza tradicional vasca adaptada al sieglu XXI col oxetivu de pasalo bien dende los sones populares.

12:45 hores. Serano, Llión.
El taller de baille llionés va llegar pola cuenta de l’Asociación de Cultura Tradicional Leonesa Serano.

13:45 hores. Peis d’hos, Pontevedra.
La Asociación Cultural Peis d’hos vien dende Cangas (O Morrazo, Pontevedra) y van facer disfrutar de los ritmos baillables gallegos.

16:30 hores. Bajo Duero, Zamora.
Bajo Duero ye un colectivu esmolecío pola recuperación del baille, la indumentaria, los cantares, los instrumentos y la tradición oral zamorana.

17:30 hores. Somerondón, de Zaragoza.
Somerondón ye una asociación dedicada al estudiu y difusión de les tradiciones y la indumentaria tradicional d’Aragón, y en Xixón van enseñar la bayura del folclore aragonés más allá de la perconocida xota.

18:30 hores. Abuela Santa Ana, d’Albacete.
Son un grupu de folclor que recueye bailles y cantos populares del so llugar, dexando pa prau les coreografíes. Nel taller d’ellos nun van faltar xotes, seguidilles y malagueñes.

Los Alcuentros de Vezos Astures siempre se rematen de nueche con una espicha, abierta tamién a la participación de tol mundu, onde se pon en práctica nun baille grande lo que s’aprendió nos talleres. La espicha ye de pagu y hai qu’acutar la entrada con Vezos primero del día 1 de payares. Va ser en Xixón, nel Llagar de Castiello, a les 21:30 hores.

Charla sobre’l pericote

Dientro, tamién, de la programación de los X Alcuentros cola tradición, el Conceyu de Cultura Tradicional Vezos Astures organiza una charla, a les 19:30 hores del vienres 3 de payares, col títulu «El pericote: 100 años después». La conferencia va ser nel Centru Municipal Xixón-Sur y nella van intervenir Yolanda Cerra y Santiago Galguera.

Nesta charla, Yolanda Cerra va repasar cróniques históriques referíes al baille del pericote pa dir desplicando cómo foi cambiando col tiempu, tanto’l propiu baille como la so visión sociolóxica y histórica. Pela so parte, Santi Galguera va facer, depués de ver dellos vídeos antiguos, un análisis de los aspeutos musicolóxicos de los bailles grabaos, desplicando la rellación ente versiones, la evolución al traviés del tiempu y les modalidaes xeográfiques del baille, la instrumentación y los sones.

Esta actividá respuende mui bien al oxetivu col que se creó Vezos Astures, y que ye’l de recoyer, estudiar y espublizar el conxuntu de tradiciones asturianes, especialmente los aspeutos rellacionaos cola música, el baille y los elementos etnográficos que lleven acomuñaos.

Be the first to comment

Leave a Reply

Tu dirección de correo no será publicada.


*