‘Los labios apretados’, con testimonios inéditos de la Revolución de 34, ta d’estrena nel Festival de Cine de Xixón

Fotograma de ‘Los labios apretados’.
Fotograma de ‘Los labios apretados’.

El documental Los Labios Apretados ta d’estrena esti 21 de payares, a les ocho la tarde, nel Centru Municipal Xixón-Sur, dientro’l Festival Internacional de Cine de Xixón. Ye un llargumetraxe d’investigación sobre la Revolución d’Ochobre de 1934 n’Asturies que dirixe Sergio Montero ‘Monty’ (L’Entregu, 1978). Esti acontecimientu revolucionariu, que ye mui poco conocíu na historia social, conviértese na película nel empiezu d’un viaxe pela memoria del pueblu al traviés de los testimonios de dalgunos de los que vivieron los socesos y que se grabaron n’Asturies y n’Arxentina.

Pel añu 2005, Sergio, el fíu mayor d’un mineru asturianu, va pa l’Arxentina ensin tener idea de que, a la vez, va facer otru viaxe pela memoria colectiva. Ye en Buenos Aires ú garra conciencia de la dimensión d’un acontecimientu históricu de repercusión mundial que pasó na tierra d’el, a la vera casa, y de la que nunca-y falaron nel sistema educativu. Al empezar a tirar del filu, Montero empieza a axuntar datos a los dos llaos del Atlánticu siguiendo’l rastru de la revolución asturiana. Ye nesi viaxe de dir y volver onde atopa’l conteníu del enunciáu «La Revolucion d’ochobre del 34».

Sergio ye’l narrador principal del documental, cuasi siempre en voz n’off. Pero nun fai un papel de narrador invisible, ye un personaxe presente pa la cámara, porque él ye’l conductor, el que tira del filu de la revolución asturiana delantre l’espectador. Nesi papel de narrador baraxa tamién l’análisis de lo que va descubriendo colos testimonios que graba de la boca de los supervivientes. Sergio apóyase tamién nun narrador secundariu, Flor Fonseca, revolucionariu de la CNT esiláu y que yá falta pero que dexó escritu un diariu que nunca se fixera públicu primero y que ye ún de los descubrimientos más importantes del documental.

La tortura de Manuel Otero.
La tortura de Manuel Otero.

La película, que llevo cinco años facela, incorpora tamién conversaciones colos últimos supervivientes que vivieron los fechos y ye’l primer llargu documental grabáu acostafecha pa la Revolución del 34. La investigación de los fechos que se narren llevó al director a archivos d’España, Francia, Holanda, Arxentina y Uruguái. Ello permitió al director facer públicos materiales importantes poco o nada conocíos como semeyes feches dende l’aire pol exércitu, documentación sindical clandestina, conseyos de guerra, semeyes publicaes na prensa obrera mundial, postales y fueyes volanderes, bandos del comité revolucionariu, cartes de militantes, diarios y retratos de revolucionarios, documentación de chivatazos, cartes de los presos condenaos a muerte, semeyes qu’enseñen les tortures de la represión… Tamién se recuperen cróniques periodístiques que fixera l’escritor arxentín Roberto Artl, qu’entrara n’Asturies de manera clandestina (porque taba declaráu l’Estáu de Guerra) como corresponsal del diariu porteñu El Mundo. Amás, la cinta recupera l’únicu rexistru fílmicu real que se conserva de la revolución asturiana –de cuasi venti minutos de llargor– y otres imáxenes mudes d’años anteriores de Mieres y d’Uviéu.

L’equipu de Los Labios Apretados complétenlu Carlos Lapeña (montaxe y realización), Asur Fuente (guionista), Dario Doria (cámara) y Javier Poplika (director de producción n’Arxentina. La banda sonora de la película inclúi’l cantar «La lloca», una composición del escritor Xulio Arbesú qu’interpreta la cantante de tonada Anabel Santiago y que mereció’l Premiu al Meyor Cantar n’asturianu nel añu 2016.

«Los Labios Apretados», llargumetraxe documental (80 min.), tien abierta una soscripción popular p’ayudar a la postproducción de la película.

Be the first to comment

Leave a Reply

Tu dirección de correo no será publicada.


*