Los oríxenes de la illustración y el diseñu gráficu n’Asturies

L’Ayuntamientu de Xixón, el Muséu Casa Natal de Xovellanos y el Muséu del Pueblu d’Asturies entamen la esposición Llínies al vuelu, una muestra antolóxica d’illustraciones, cartelismu y gráfica publicitaria firmao por autores asturianos –toos homes– ente los años 1879 y 1937. Collaboren patrocinando esta muestra grandisíma y el catálogu que recueye toles obres la Caxa Rural d’Asturies y Artes Gráfiques Eujoa. L’encargu foi posible gracies al trabayu de comisariu del historiador y críticu asturianu Francisco Crabiffosse.

Llinies al vuelu articúlase a partir de les innovaciones que lleguen al mundu de la imprenta n’Asturies dende finales del sieglu XIX y hasta l’empiezu de la Guerra Civil. Estes novedaes van impulsar l’usu d’illustraciones en periódicos, revistes y nes ediciones de llibros y van desarrollase la publicidá y el cartelismu. Al dir a más la cantidá y calidá de les publicaciones, va dir aumentando la nómina d’autores y van evolucionar los estilos haste vese reflexaos nos trabayos los rasgos de les vanguardies europeees, conectando los trabayos fechos n’Asturies cola gráfica internacional.

Boceto de cartel, de Mariano Moré.
Boceto de cartel, de Mariano Moré.

Nesta muestra, importantísima pola calidá y cantidá de trabayos que s’enseñen, pueden disfrutase obres de pintores tan reconocíos como José Cuevas, Evaristo Valle, Nicanor Piñole, Mariano Moré, Paulino Vicente, Eugenio Tamayo o Joaquín Vaquero Palacios, pero ye importante sobremanera pa poder descubrir la calidá almirable d’otros, como Pedrín Sánchez, Ventura Álvarez Sala, Alfredo Truan o Alejandro Sirio. En cuantes a les obres, destaquen los grabaos que publicó José Cuevas en la Ilustración Gallega y Asturiana pola cantidá y calidá d’información que dan sobre’l nuestru país, –paisaxe y paisanaxe–, tamién les obres que fixeron artistes de Xixón –caricatures satíriques mayormente– pa publicaciones españoles, la obra ¡Hasta otru añu! de Juan Martínez Abades pa la revista Blanco y Negro, el bocetu pa un cartel promocional de les fiestes de Xixón de 1906 que firma Evaristo Valle, una ilustración titulada Campesina asturiana que Pedrín Sanchez fixo pa la revista Blanco y Negro o, del mesmu autor, una obra sin títulu, que representa una muyer mui compuesta y estilizada con un neñu en cuellu, procedente d’una colección particular.

Yá n’estilu de vanguardia llamen l’atención trabayos publicitarios d’una categoria mui grande de Mariano Moré, impresos na Litografía Viña, y los sos dibuxos sobre estampes de la Guerra Civil. Nesti periodu terrible de la historia d’Asturies les obres de cartelismu de Germán Horacio pal Frente Popular son tamién de categoría superior. De los autores asturianos que s’esilaron n’América destaquen les obres d’Alejandro Sirio y Germán Horacio, esti últimu fixo munches y bones ilustraciones pa les ediciones del escritor xixonés, tamién esiláu, Alfonso Camín.

La esposición puede visitase hasta’l 5 de payares nel pisu segundu del Antiguu Institutu de Xixón y va ser, lo más seguro, la meyor muestra del añu n’Asturies. Una gran oportunidá pa ver el trabayu gráficu tan importante de munchos y bonos autores asturianos nos medios de comunicación, la propaganda y el mundu editorial ente 1879 y 1937.

Firma’l diseñu editorial del catálogu y del folletu promocional el diseñador de Xixón Manuel Fernández. El catálogu recueye toles obres espuestes y pue consultase y descargase de baldre na dirección web http://museos.gijon.es/multimedia_objects/download?object_id=214807&object_type=document

Esposición Llínies al vuelu
Antiguu Institutu Xovellanos, Xixón
Hasta’l 5 de payares

Be the first to comment

Leave a Reply

Tu dirección de correo no será publicada.


*