Lucas 15. Una batalla ganada

Xel Pereda y Nacho VegasLucas 15 ye’l perguapu proyectu de Xel Pereda pa tocar el cancioneru popular asturianu con soníos mui personales de folk y rock. Yá nel 2007, col so primer trabayu, esti proyectu algamó una dimensión grandísima y nél involucráronse de pleno músicos como Chus Naves, Nacho Vegas, Luis Rodríguez o Manu Molina. Pal segundu trabayu, siete años depués, Lucas 15 garra un aire más personal, al ser Xel Pereda’l que grabó tolos instrumentos pa depués ofrecer directos cola banda completa. Nel conciertu de presentación del Teatru Xovellanos, tuvieron Xel Pereda (voz y guitarres), Nacho Vegas (voz y guitarres), Luis Rodríguez (baxu), Abraham Boba (teclaos), Manu Molina (batería), Fran Pereda (guitarres), Angel Ruiz (pedal steel), el Coru Voces de Cimadevilla y una sección de cuerda.

Xel Pereda grabó’l so últimu discu en casa y ta compuestu de cantares que lu acompañaron tola vida. In memoriam inclui once temes populares asturianos: «Carmín de la Pola», «Agora non», «Romance del Penitente», «Si la nieve», «Nel campu solu / Xilguerín parleru», «Arrea carretero», «Vaqueiraes», «Soledá», «Ónde vas por agua», «La raitana» y «Santa Bárbara bendita». El trabayu edítalu’l sellu Lloria, propiedá del músicu, y tuvo financiáu con más de cinco mil euros por munchos mecenes, cola técnica conocida cola voz inglesa crowdfunding. Los mecenes tuvieron accesu a demos acústiques de cada canción, al siguimientu d’un vídeublog que narraba’l procesu de creación y tamién a un documental. La edición llimitada del discu físicu siguió un procesu d’estucháu artesanal.

Be the first to comment

Leave a Reply

Tu dirección de correo no será publicada.


*