Luis Núñez y los Folganzanes ganen el X Premiu al Meyor Cantar

Actuación de Luis Núñez y los Folganzanes, ganadores del X Premiu al Meyor Cantar. Foto: Xurde Margaride.
Actuación de Luis Núñez y los Folganzanes, ganadores del X Premiu al Meyor Cantar. Foto: Xurde Margaride.

El músicu Luis Núñez cásique nun podía falar el vienres 29 de setiembre cuando, pasaes les nueve de la nueche, xubió a les tables del Teatru Palacio Valdés d’Avilés a recoyer la escultura La Payarina como ganador de la décima edición del Premiu al Meyor Cantar pol tema «La ñeve y la esmeralda», del que compunxo tanto la lletra como la música. Cuasi una hora primero, Núñez interpretara esti cantar delantre del públicu qu’enllenaba’l patiu de butaques del Palacio Valdés al frente de la banda Luis Núñez y los Folganzanes, nuna actuación enllena de fuercia que, xunto cola calidá artística del propiu cantar, ameritó’l favor del xuráu.

Luis Núñez, depués de la gala, mostró la so satisfacción y la de tolos músicos pol «reconocimientu y la valoración del trabayu fechu que supón esti premiu». Tamién destacó lo importante que ye esti gallardón pa poder caltener una banda de seis músicos que tienen caún un trabayu aparte de la música; «esto esixe un esfuerciu y un compromisu considerables que, si nun ye polos conciertos que se faigan o por reconocimientos como’l Premiu al Meyor Cantar, ye mui difícil de sostener nel tiempu», señaló.

La gala, que conducieron los periodistes Sonia Fidalgo y Naciu Varillas, empezó a les ocho de la tarde cola actuación del primer finalista d’esti añu, Bras Rodrigo, que defendió, xunto a los sos músicos, el cantar «Naquel malecón», un tema que forma parte del so discu más recién, A pause in New York, y que fala de la emigración dende Europa a tierres americanes, concretamente a la ciudá de los rascacielos.

La segunda actuación de la nueche foi la del grupu ganador, Luis Núñez y los Folganzanes, onde, amás de Luis Núñez (voz y guitarra), tocaron los músicos Rubén Alba (flauta), Marcos Díaz (baxu), Armando Fernández (teclaos), Arturo Ávila (batería) y Diego Infiesta (guitarra). El tema que llevaron al concursu, «La ñeve y la esmeralda», ye ún de los diez que componen el segundu discu del grupu, Xuro nun tornar, que tamién cuenta con delles canciones con lletra orixinal de la poeta Susana Sela.

A la de Luis Núñez y los Folganzanes siguió l’actuación de Hoboken Band, una formación creada n’ochobre del 2015 y que lidera César González Herrerías. Él ye tamién l’autor del cantar col que compitieron nel certame, «Sonrises nel cielu», un tema de carácter señaldosu nel testu pero que na interpretación garró matices mui brillantes y frescos.

L’últimu finalista de la nueche foi Odón del Paganéu, un cantador de tonada asturiana que s’acompañó nel escenariu de la flauta de Pepín de Muñalén y la guitarra de Nel de Purnea. La so interpretación del cantar «Soi ya vengo de Tinéu / La inconformidá» foi una de les que más aplaudió’l públicu na nueche del 29 de setiembre nel Palacio Valdés, tanto pola fondura de la voz d’Odón –d’«ancestral» la llegó a calificar dalgún de los asistentes– como pola elegancia del acompañamientu instrumental.

Anabel Santiago. Foto: Xurde Margaride.
Anabel Santiago. Foto: Xurde Margaride.

Depués de sentir los cantares de los cuatro finalistes, foi’l turnu del conciertu de la ganadora del añu pasáu, Anabel Santiago, qu’interpretó parte del espectáculu col que ta agora mesmo de xira: Electronic Llances. Nesta propuesta musical nueva, la diferencia más llamativa si se compara con espectáculos anteriores de la cantante nacida en Buenos Aires ye la presencia del Dj Javier Suárez ‘Fruela 757’, que ye l’encargáu de poner les bases y los ritmos electrónicos colos que se mecen cantares ya tradicionales nel repertoriu d’Anabel Santiago como «Galán de esta villa» –col qu’abrió’l conciertu–, «El que me cortexa a mi» o «Tráimela». Sicasí, la pieza cola que más s’emocionó’l públicu foi «Picos d’europa», un tema col que fixo arrespigase a más d’ún. «La lloca», el tangu que compunxera pa ella Xulio Arbesú y col que ganó la edición anterior del Premiu al Meyor Cantar, foi la canción cola que zarró’l conciertu.

Al Premiu al Meyor Cantar, que convoca la Conseyería d’Educación y Cultura, puen presentase toles creaciones musicales orixinales tanto na lletra como na música escrites n’asturianu y en gallego-asturianu que se comercializaren a lo llargo del añu anterior. La escoyeta tanto de los cantares finalistes como del cantar ganador –que se decide nuna gala en directo como la del vienres 29 de setiembre– ta al cargu d’un xuráu d’especialistes, xuráu que, nesta ocasión, formáronlu Fernando Padilla Palicio, director xeneral de Planificación Llingüística y Normalización, como presidente; Amparo Antuña Asenjo, directora del Conservatoriu de Música Valle del Nalón; Aurelio Argel, críticu musical; Ismael María González Arias, director de la Casa la Cultura de Mieres del Camín y escritor; Marta Mori de Arriba, escritora y vicepresidenta de l’Academia de la Llingua Asturiana; Montserrat Machicado Company, responsable de la Estaya de la Llingua del Ayuntamientu d’Avilés, y Lourdes Álvarez García, responsable de promoción del asturianu nel Serviciu de Planificación Llingüística y Normalización, en calidá de secretaria.

Be the first to comment

Leave a Reply

Tu dirección de correo no será publicada.


*