Luisa Rocha y Maria Ana Bobone, protagonistes del VII Ciclu Nueches de Fadu

Luisa Rocha (esquierda) y Maria Ana Bobone (derecha).

La séptima edición del ciclu Nueches de Fado «Divas», que cada seronda programa’l Conceyu d’Uviéu, trai anguaño al Teatru Filarmónica a dos figures del fadu que pasen per un momentu profesional magníficu: Luisa Rocha y Maria Ana Bobone. El conciertu de la primera va ser el 26 de payares, mentes que’l de Bobone ta programáu pal 17 d’avientu, entrambos los dos a les 20:30 hores.

Luisa Rocha ye una fadista con una trayectora llarga y representa como poques l’alma lisboeta más racial y auténtica. Cantante carismática, conquista al públicu cola so voz fonda, enllena de sabencia y guapura. N’Uviéu va presentar el discu Fado Veneno, un álbum onde contó cola producción de Carlos Manuel Proença y la participación de músicos de sonadía como’l propiu Proença, Ângelo Freire o Daniel Pinto. Nesti trabayu axunta fados tradicionales con pieces de creación nueva, que lleven la firma de poetes y compositores como Maria de Lourdes Carvalho, Tozé Brito, Jorge Fernando, Nuno Miguel Guedes, Gonçalo Salgueiro o José Carlos Malato.

La otra protagonista del ciclu, Maria Ana Bobone, ye una cantante nacida n’Oporto en 1974 y una de les fadistes más grandes de la so xeneración. De formación clásica –ye llicenciada en pianu y cantu–, tien una voz dotada d’una suavidá estraordinaria que-y permite andar peles siendes del fadu más clásicu o metese per caminos nuevos, con testures más contemporánees. A Uviéu, sicasí, va traer un repertoriu más tradicional, pa lo que se va a acompañar d’un tríu de músicos de primer nivel: Bruno Mira (guitarra portuguesa), Pedro Pinhal (guitarra clásica) y Rodrigo Serrão (contrabaxu).

Nueches de Fado «Divas» cuenta, dende la primer edición, col apoyu del Institutu Camões y la Embaxada de Portugal, y convirtióse yá nuna cita que los amantes del fadu procuren nun perder. A lo llargo d’estes temporaes, Uviéu vio nes tables del Filarmónica a delles de les fadistes más representatives de la escena actual: de Carminho a Mísia, pasando per Joana Amendoeira, Cristina Branco, Ana Moura, Raquel Tavares, Cristina Nóbrega, Carla Pires o Aldina Duarte.

Be the first to comment

Leave a Reply

Tu dirección de correo no será publicada.


*