Mare Nostrum: la mirada humana al drama de los refuxaos

El Mare Nostrum (el mar nuestru) bautizáu polos romanos ye una canal de comerciu dende cuando los fenicios y una ponte ente les cultures de les orielles del oriente y del occidente del Mediterráneu. Más de siete mil migrantes morrieron intentando pasar esi mar nos dos años últimos. Guerres, fames, persecuciones… son munches les coses de les que fuxen.

Europa deshumaniza esta traxedia dibuxando númberos y protexendo les fronteres. La esposición Mare Nostrum enseña, nel Centru Niemeyer d’Avilés hasta’l 7 xineru del 2018, cincuenta semeyes d’esta situación terrible que se vive nel mar Mediterraneu. Les fotos fírmenles cinco autores de valir reconociu a nivel mundial enfotaos en documentar la vida que ta alredor d’ellos, revelenado les causes y repercusiones d’esti viaxe desesperáu y que son:

Manu Brabo (Zaragoza, 1981) fotoperiodista independiente que trabaya lo más en conflictos sociales. Dende l’añu 2007 ta percorriendo’l mundu retratando llevantamientos y guerres civiles en países como Haití, Hondures, Kosovo, Palestina, Libia, Siria o Ucrania. Ta premiáu col Pulitzer del añu 2013 y tien otros premios más.

Guillem Valle (Barcelona, 1983) empieza a interesase en facer semeyes de manera casual nun intercambiu escolar, a los catorce años, en Sarajevo. Tien trabayao en conflictos del Líbano, Libia o Siria. Nel añu 2010 punxo la base en Bangkok y cubre l’actualidá del sudeste d’Asia pa medios como’l The New York Times, The Guardian o Wallstreet Journal. Mereció’l premiu World Press Photo y el Best of Photojournalism.

Diego Ibarra Sánchez (Zaragoza, 1982) fotoperiodista que tien la base en Beirú, n’El Líbano, entiende’l facer semeyes como la manera d’él de rellacionase de forma íntima col mundu y de consiguir, a la vez, el pensamientu críticu del espectador. Tuvo cinco años pa Paquistán y documentó les consecuencies de les riaes, pasando a ser un fotógrafu de referencia pa medios mundiales como The New York Times, Der Spiegel o Al Jazeera. Los últimos años tuvo trabayando p’Afganistán, Nixeria, Colombia y Iraq. Tien ganaos dellos premios importantes tamién.

Fabio Bucciarelli (Torino, 1980), fotoperiodista que lleva trabayao nos últimos conflictos de Libia, Siria, Iraq, Sudán del Sur, Haití o Mali. Collabora con medios tan famosos como Time y cola AFP y semeyes d’él publíquense en periódicos del mundu enteru. Nel apartáu de los gallardones que tien ganao tán la Robert Capa Gold Medal y el Word Press Photo. Tien colingao obra en galeríes de Nueva York, Londres, Roma o Amsterdam, ente otres ciudaes. Nel añu 2016 sacó un llibru que se titula The Dream, un trabayu que-y llevó cinco años y que retrata la crisis mundial de los refuxaos.

José Colón (Sevilla, 1975) ta especializáu na semeya documental y nel fotoperiodismu, y ta publicando trabayos en medios internacionales, amás de collaborar cola axencia AFP. Vive ente Barcelona y Sevilla y ta enfocando’l trabayu d’él pa los drames derivaos de la crisis económica y les migraciones.

Les semeyes d’esta esposición documenten la marcha de persones exiliaes o refuxaes por culpa de la guerra ente les fuercies de la coalición internacional, el gobiernu afganu y los talibanes nel país d’Afganistán; por cuenta de la presencia de grupos rebeldes y talibanes que lluchen contra l’exércitu de Paquistán y pola presencia del Estáu Islámicu, tamién en Paquistán; por culpa la guerra civil de Siria y la presencia mui grande del estáu Islámicu nel país siriu; por cuenta la guerra contra l’Estáu Islámicu n’Irak; pola guerra del Yemen ente les fuercies del Gobiernu y los rebeldes Hutíes y pola gran presencia d’Al Qaeda nesi país; por culpa les fames y la seca de Somalia, agravao too pola violencia del grupu yihadista Al-Shabaab; por causa’l réxime de dictadura n’Eritrea; pola guerra civil del Sudán del Sur; y pola que tamién hai na República Centroafricana; por culpa la crisis humanitaria de Nixeria y pola violencia nesi país del grupu radical islamista Boko Haram; polos conflictos y rebeliones y la prensencia grandísima de yihadistes en Mali y pola xente qu’escapa de los 37 años de dictadora en Guinea. Toes estes guerres y situaciones de violencia de contino fain que la xente quiera escapar pa Europa cruzando’l Mediterráneu n’algún puntu.

Mare Nostrum
Manu Brabo, Guillem Valle, Diego Ibarra, Fabio Bucciarelli y José Colón
Centru Niemeyer
Hasta’l 7 de xineru del 2018

Be the first to comment

Leave a Reply

Tu dirección de correo no será publicada.


*