Maroon V, el sueñu americanu

Si se xunten media docena de rapazos gallasperos californianos a facer música pop-rock, y resulta que lo faen bien, pasen a ser referente de la música del so tiempu. Maroon V lleva cinco discos editaos hasta la fecha y pue dicise que nacieron de pies. La formación faise conocida nel 2002, depués d’una primer experiencia con otru nome y un discu que pasó ensin pena nin gloria. Foi col trabayu discográficu tituláu Songs about Jane cola qu’abrieron una carrera d’ésitos que llega hasta anguaño. El primer discu ta compuestu de cantares d’amor que’l vocalista, Adam Levine, compunxera pa la que yera la so moza d’aquella. La pareya rompió, pero cantares como «This Love» convirtéronse nun himnu del grupu y de la xente que los sigue. Tamién connsiguieron esa categoría «She will be loved» o «Moves like Jagger».

Na carrerona que lleven Maroon V nun-yos queda premiu que ganar. Llevaron dellos Grammy, Billboard, MTV, etc. Esti añu dieron conciertos en Madrid y en Barcelona, que destacaron pola entrega de la banda y pola enerxía y puesta n’escena del so vocalista, Adam Levine. Adam, que nun da parada en tol cociertu, tien una voz de tenor qu’algama cuatro octaves y pue cantar en falsete. Esti rapaz elegante, llocu de los coches clásicos y la vida californiana, amás de músicu y compositor, ye presentador, actor y escritor, y convirtióse nun símbolu sexual pa muyeres y homes de tol mundu.

Nel 2014, Marron V publicó’l so discu más recién, tituláu V, del que sacaron 3 pieces sueltes, ente les que destacó la del cantar «Sugar», que lleva vendíes más de dos millones y mediu de copies dixitales. El videu lleva casi novecientos mil visionaos en Youtube. Y nun ye d’estrañar que guste tanto porque axunta una música pagadizo, unos cambios de ritmu mui acertaos, munchu bon rollu y sorpreses. Ye d’esos cantares que suenen a cada nada nos filos musicales de los ximnasios o nes radio-fórmules, una pieza que ye dulce pero que nun empalaga.

Marron V, nel so últimu discu, axunta temes mui comerciales y perpegadizos con otros más seles, íntimos o más duros, recuperando parte de les maneres d’ellos de cuando empezaron. Y consiguen facelo mui bien.

Be the first to comment

Leave a Reply

Tu dirección de correo no será publicada.


*