Villaviciosa acueye la VII Xunta d’Escritores Asturianos

Participantes na Xunta d'Escritores de 2004, en Llanes.
Participantes na Xunta d'Escritores de 2004, en Llanes.

El Gobiernu d’Asturies recupera anguaño la Xunta d’Escritores, trece años depués de la última edición, celebrada nel 2004 en Llanes, y cuando se cumplen trenta dende la primera, la de Villamayor, de 1987. L’alcuentru va celebrase los díes 28 y 29 d’ochobre en Villaviciosa y nél van participar más de cien profesionales de la edición y la promoción de la lliteratura n’asturianu y en gallego-asturianu, dende escritores a periodistes, críticos lliterarios, editores, llibreros, técnicos de los servicios de normalización o representantes de les instituciones, ente otros perfiles.

Baxo’l títulu Lliteratura asturiana presente, esta séptima edición faise col envís d’actualizar la situación de les lletres asturianes y reivindicar la so presencia na sociedá. Con esti fin, la Conseyería d’Educación y Cultura diseñó un programa qu’inclúi diez meses de debate onde van participar un total de 54 autores y que se van desenvolver dende la mañana del sábadu hasta’l meudía del domingu en dos escenarios: el Teatru Riera y la Casa de los Hevia.

Nestos diálogos van tratase temes como’l presente de la lliteratura del país, el relevu xeneracional, la traducción al asturianu, el papel de los medios de comunicación, la importancia de la lliteratura infantil y xuvenil, la crítica lliteraria, la difusión y normalización de la producción cultural, y la novela, ente otros.

Participantes na Xunta d'Escritores de 1987, en Villamayor.
Participantes na Xunta d’Escritores de 1987, en Villamayor.

Amás, el sábadu 28, a les 12 del meudía, va facese un homenaxe al escritor, historiador y críticu lliterariu Xosé Caveda y Nava (Villaviciosa, 1796 – Xixón, 1882) a les puertes de la so casa natal, na cai del Agua. El programa tamién inclúi la presentación del documental Escribiendo’l camín, 30 años de xuntes d’escritores asturianos y va editase, cola collaboración de la revista Formientu, una publicación conmemorativa qu’axunta una muestra de los autores más mozos. Otros materiales de reflexón que la Conseyería d’Educación y Cultura editó pa la ocasión son un llibru con aportaciones crítiques de dellos especialistes sobre los aspectos más destacables de la lliteratura n’asturianu y un númberu nuevu de Trabatel. Revista eonaviega de lliteratura.

La literatura asturiana vista dende fuera

Amás de los creadores asturianos, van participar nes actividaes d’esta VII Xunta d’Escritores tres autores representativos de la creación lliteraria n’otres llingües peninsulares: la poeta cordobesa Elena Medel, l’escritor portugués José Rui Teixeira y la escritora valenciana Anna Moner, que van intervenir, junto a los asturianos Xuan Bello y Berta Piñán, na mesa de debate «En perspectiva. La lliteratura asturiana vista dende fuera», que va moderar el director de Cultura del Institutu Cervantes, Martín López-Vega.

Elena Medel (Córdoba, 1985) ye autora de tres llibros de poesía, que tán axuntaos nel volume Un día negro en una casa de mentira (Visor, 2015), y del ensayu El mundo mago. Cómo vivir con Antonio Machado (Ariel, 2015). Dirixe la editorial de poesía La Bella Varsovia, collabora con dellos medios de comunicación y da talleres de escritura. Tamién coordina’l proyectu «Cien de cien», que tien como oxetivu la visibilización de la obra de les poetes españoles del sieglu XX. Ente otros gallardones, ganó’l XXVI Premiu Loewe a la Creación Moza y el Premiu Fundación Princesa de Girona 2016 na categoría d’Artes y Lletres.

José Rui Teixeira (Oporto, 1974) ye director y presidente del conseyu científicu de la Cátedra Poesía y Trescendencia. Sophia de Mello Breyner de la Universidá Católica Portuguesa d’Oporto. Participa en centros d’investigación de delles universidaes, como la de París-Sorbona, la Ramón Llull de Barcelona, y la de Bolonia. Editor de Cosmorama Edições, axuntó la so poesía nel llibru Diáspora (2009) y vien de publicar, anguaño, la obra Antípoda (2017).

Anna Moner (Vila-Real, 1967) ye artista plástica y escritora. Coautora de la obra teatral La morta enamorada, estrenada nel 2010, tien publicao una docena de rellatos y les noveles Les mans de la deixebla, Premiu Enric Valor de la Diputación d’Alicante, y El retorn de l’Hongarès, Premiu Alfons el Magnànim de la Diputación de València y Premiu Túria a la meyor contribución lliteraria. Amás, la so obra Gabinet de curiositats (Pruna Llibres, 2015) llogró, l’añu pasáu, el Premiu de la Crítica dels Escriptors Valencians al meyor ensayu.

Nel enllaz siguiente, pue accedese al programa completu de la VII Xunta d’Escritores Asturianos: Programa.

Be the first to comment

Leave a Reply

Tu dirección de correo no será publicada.


*