Montesinho, onde la carretera acaba

Cases y güertes de Montesinho | Foto: Miguel Vieira.
Cases y güertes de Montesinho | Foto: Miguel Vieira.

HENRIQUE G. FACURIELLA
«Nun mires la carretera, síguila hasta’l final». Estes palabres son les que fain que’l protagonista del cuentu «O Peregrino (El pelegrín)», de Fernando Pessoa, dexe les comodidaes de la casa de so padre y de so madre y empiece un viaxe iniciáticu país alantre. Quiciás, al figurase’l siguir la carretera hasta’l final, hasta onde acaba, Pessoa pensara na aldea de Montesinho, al norte de Bragança, o quiciás nun tuviera nada que ver. Lo que sí ye cierto ye qu’ésta foi la sensación que me produció a mi’l llegar a esta aldea portuguesa asitiada a unos pocos kilómetros de la frontera con España, porque la carretera acaba nella, más p’allá nun hai otro que caminos de monte.

L’aldea de Montesinho ta nel mediu del parque natural col que comparte’l nome y que ye’l norte estremu de la rexón de Trás-os-Montes. A la otra mano del cordal, empieza la comarca de la Senabria, cola que tien en común muncha historia, cultura y medios de vida. Si’l viaxe s’empieza dende’l sur, dende la ciudá de Bragança, el paisaxe aterrazáu enllenu d’olivares va dando pasu a montes de castañales, toes elles bien ordenadines y cuidaes, porque de la castaña depende muncho la economía familiar de los habitantes d’esta tierra. Esti territoriu vio, nos años del desarrollu industrial, cómo la xente mozo emigraba al sur del país o a Europa y agora ta viviendo un renacimientu gracies a dos factores: la vuelta d’aquellos que marcharon nos años 60 y 70 –que quieren más pasar el retiru nos pueblos onde nacieron– y la de los nietos, que ven nos terrenos y cases familiares una manera de ganase la vida meyor que la que puen atopar nes ciudaes.

Esti ye’l casu d’Anabela, la dueña de la Casa da Edra, un establecimientu hosteleru asitiáu a la entrada mesmamente de l’aldea de Montesinho. L’edificiu qu’ocupa güei l’hotel foi, n’otros tiempos, la casa, la cuadra y la tenada de los güelos d’ella, la mesma casa onde pasaba los branos y que, hai unos años, decidió arreglar y convertir nun sitiu onde atopar asosiegu. La implicación emocional d’Anabela cola casa ye absoluta, pero mayor tovía ye’l so esfuerciu por facer que les persones que s’agospien nella s’alcuentren acoyíes, atendíes, cuidaes…

Casa da Edra.
Atapecer na Casa da Edra.

Pa empezar, Anabela ye l’amabilidá fecha muyer y de les sos manes salen coses maraviyoses, como mermelaes, compotes, llicores, pastes, panes de castaña y un cientu de productos más fechos colos ingredientes que dan les güertes de la redolada: calabaces, figos, mores, miruéndanos, ablanes… hasta los frutos del xabú, eses bolines negres qu’equí suelen acabar pel suelu y qu’Anabela tresforma en confitures y llicores d’un sabor esquisitu. Llevantase pela mañana y atopar la mesa iguada con toos estos productos p’almorzar ye una esperiencia que fai empezar el día con un ánimu desconocíu pa la xente avezao a salir a trabayar con un café bebíu y cuatro galletes industriales.

Pero l’interés d’Anabela nun ye solo que la xente coma coses riques, duerma nuna cama confortable y zarre los güeyos de nueche sintiendo namás que’l silenciu. Non, esto son los medios pal fin mayor, que ye tresmiti-yos a los sos posaderos tolo que los habitantes de Montesinho viven nel día a día: una vida calmada, que se manda pelos ciclos de la naturaleza y orientada según usos tradicionales qu’ellos tovía conserven, como’l decidir los asuntos qu’afecten a l’aldea a conceyu abiertu.

Montesinho ye, verdaderamente, un sitiu únicu, un sitiu onde dan unes ganes tremendes de poner casa y güerta pa facer una vida estremada dafechu de la qu’ún tien anguaño. Un bon conseyu’l del cuentu de Pessoa del que falaba al principiu: nun mirar pa la carretera, sinón siguila hasta’l final, sobre too si esi final ye l’aldea de Montesinho y la Casa da Edra.

Be the first to comment

Leave a Reply

Tu dirección de correo no será publicada.


*