Nal Amaro, de la revolución a l’acción poética

Na Llaboral Centro d’Arte y Creación Industrial pudo vese hasta’l 15 de payares de 2015 una esposición sobre la obra del performer, poeta, novelista, dramaturgu y activista cultural Nel Amaro, nel marcu de la programación de les Xornaes de Diseñu Motiva 2015.

Hai quien ye a definir la práctica artística como l’antítesis de la esfera del trabayu, sicasí, hai trayectories como la de Nel Amaro que faen qu’esa definición nun tenga xacíu. Cuando crear ye tamién crease ún a sí mesmu, nociones como productividá trescienden la separación ente lo profesional y lo personal, xenerando una dedicación que va más allá de la xornada llaboral d’ocho hores cinco díes a la selmana. Si pal artista Richard Long caminar ensin una ruta o oxetivu claru pue suponer una manera de creación bien útil pa desvelar les contradicciones de les sociedaes tecnocrátiques, hai qu’entender tamién la vida de Nel Amaro (Quentuserrón, Mieres, 1946 – Uviéu, 2011) como un forma d’arte: una tentativa totalizadora y desmaterializada, la de convertir la vida n’arte, que fai de tolos xestos una ferramienta política pa la tresformación social, xunto con una postura vital innegociable frente a la realidá.

Presu políticu al final del franquismu, a partir de los años 70, Nel Amaro publicó llibros de poemes, noveles, teatru, ensayos, cómics, cuentos y artículos. Siempre n’asturianu, la so lliteratura dexaba testimoniu de la problemática social que, daquella y agora, viven los valles mineros asturianos.

Poesía visual de Nel Amaro. Moonligth, 1990
Poesía visual de Nel Amaro. Moonligth, 1990

La muestra documental de la so carrera axunta materiales a partir de 1988, añu que se dedica a la poesía visual como parte del colectivu Auxilios Mutuos. Recueye documentos y tamién obres de les sos múltiples facetes como creador: dende fanzinos y otres publicaciones onde participa, al so trabayu alredor del arte per corréu (mail-art) –unviando mensaxes al través d’imaxes y oxetos–, y tamién poesía fonética y visual pa, al final, desembocar nel ámbitu de l’acción.

A partir de los años 90, Amaro conviértese nun de los representantes asturianos más destacaos de la performance<(i>, amás d’una figura clave pa entender el trabayu en rede enantes de la rede. Foi frecuente que los sos trabayos s’escondieren tres de los nomes de colectivos estremaos: Arte étnicu 100%, Llaboratoriu Turón Escéntricu, O.N.G., Performers ensin fronteres, Fundizión Malevich, Espaciu Arte Escénicu, etc. N’ocasiones cuntó cola collaboración d’Abel Loureda o de Rogelio Crespo, y inclusive cola del so perru Pulgu.

Comisariu: Alfredo Aracil
http://www.laboralcentrodearte.org/es/exposiciones/accion-poetica

Be the first to comment

Leave a Reply

Tu dirección de correo no será publicada.


*