Nueche en danza. El pueblu soberanu

Nueche en danza

La Nueche en Danza ye una xuntanza de xente pa baillar, tocar y cantar pieces tradicionales asturianes ensin más pretensión que la de pasalo bien. A les nueches en danza vase vistíu ensin traxes tradicionales, nun ye necesario pertenecer a un grupu folclóricu, banda gaites o formación folk y nun fai falta saber baillar. Ye un sitiu onde se puede aprender baillando o onde baillen pol puru gustu los que yá saben. Namás qu’hai que garrase a una pareya y a la fila y siguir el son y los pasos. Les nueches en danza son bailles pa tolos públicos y edaes, hai xente mozo, de mediana edá y mayores.

Va años que s’empezaron a llamar a dalgunos espacios programaos pal baille nes fiestes Nueche en danza, pero les más recientes y masives –y les que tán teniendo continuidá– son les que nacieron «a propuesta de xente que trabaya pola recuperación y difusión del folclore tradicional d’Asturies col envís de crear un eventu periódicu d’ociu, col baille y la música tradicional d’Asturies como filu conductor del mesmu». Les nueches en danza entámense como una andecha ente los distintos grupos de baille tradicional y xente venceyao al folclor asturianu y nun son nin un espectáculu, nin una actuación, nin un concursu, sinón un espaciu llibre de diversión. La meyor manera de tar al tanto de les informaciones que se xeneren alredor de les nueches en danza ye seguiendo la so páxina na rede social Facebook.

La dinámica de les nueches en danza enseña lo bien que tán pensaes pa que sían daqué qu’entama’l pueblu, que decide’l pueblu y que disfrutalo’l mesmu pueblu soberanu. La nueche en danza ye un espaciu abiertu a toos, que promueven les persones a títulu individual, ensin nenguna ayuda pública nin nenguna institución pública nin privada detrás. Los grupos qu’andechen n’entamar les nueches en danza son los que s’encarguen de tocar, por turnos, pa que tol mundu pueda tocar y tamién disfrutar del baille, pero faenlo d’una manera anónima, cola fin de que nun haya personalismos nin protagonismos grupales. La protagonista nes nueches en danza ye la música tradicional asturiana y l’escenariu nun ta pensáu pa llucise una estrella, sinon munches, porque lo meyor de la música asturiana participa. La presencia nel escenariu ta, amás, abierta pa tol que quiera tocar pal baille, apuntándose primero. Esti ye un detalle perimportante, nun ye lo mesmo tocar música tradicional asturiana que tocar pal baille, hai que ser fieles a la tradición y conservar los cambios de cada pieza pa los bailladores.

Na nueche en danza naide cobra por tocar y naide paga por dir a baillar. Ye una fiesta popular que nun manexa presupuestu nin remanente. Los sitios onde se fexo hasta la fecha contaben con barra pa tomar daqué de comer o beber, pero nun ye obligatorio facelo. Dende la primer nueche en danza –que se fexo en La Nueva, nel valle de Samuño en Llangréu, el 14 de marzu–, hubo una nueche cada mes hasta que empezo’l branu, cuando se suspendieron. La segunda Nueche en danza fue en Valdesoto, en Siero, y la tercera en Foyéu, en Valdés. Na seronda volvieron recuperase y fíxose la Nueche en danza de Grau, nel mes de payares.

Les nueches en danza empiecen a les diez y media de la nueche y suelen durar, polo menos, hasta les tres de la mañana y convirtiéronse nun éxitu grandísimu de la sociedá que s’autoorganiza, nuna demostración viva de que la manera d’entamar coses los asturianos, n’andecha, poniendo cada persona’l trabayu pal beneficiu común, ye más necesaria que nunca. Tamién demuestren la cantidá de xente qu’anguaño disfruta del baille y la música tradicional n’Asturies. Impresiona ver tantes pareyes en tantes fileres baillando pol gustu puru de facelo, ensin ser un espectáculu pa los que miren. Y impresiona tamién ver cómo lo que nun foi quién a facer nengún gobiernu de nengún conceyu de los 78 que tien el país, nin tampoco foi quién a facer un gobiernu asturianu que alministra miles de millones d’euros, pudo facelo la xente, y d’una manera impecable.

Be the first to comment

Leave a Reply

Tu dirección de correo no será publicada.


*