‘Nun queisa’, un retratu cuntáu del bolu vaqueiru

L’Asociación de Bolo Vaqueiro tien un canal en YouTube onde pue vese’l documental Nun queisa, una pieza que dura media hora abondante y onde se cuenta n’asturianu occidental el procesu de recuperación del bolu vaqueiru, una modalidá de xuegu de los bolos propia de la zona de Cangas, Tinéu, Degaña y Ḷḷaciana. Esti xuegu de bolos, masculinizáu dafechu, tuvo nesta fastera munchísima fuercia, con boleres en cuasi tolos pueblos. Cola emigración, los bolos cuasi desapaecieron, pero volvieron recuperase. Anguaño, tán federaos trescientos xugadores.

Los bolos son un momentu pa esparder, pa rellacionase y de vida nos pueblos. Na bolera vese la rivalidá pero tamién l’amistá. Vieyos que miren xugar a los mozos y neños que ven xugar a los mayores. La idea ye pasalo bien y, aparte de ganar, nun perder, nun dexar que se pierdan los deportes y xuegos tradicionales. El documental recueye munchos testimonios de xugadores de toles edaes y enseña cómo ye esta modalidá de bolos, mui diferente de les que xuguen na zona centru d’Asturies.

Esti trabayu audiovisual bien guapu, de difusión del nuestru patrimoniu cultural y llingüísticu, cuntó cola ayuda del Conceyu de Cangas y del Serviciu de Normalización Llinguística. La idea nació del investigador Carlos Suari, que ye tamién responsable del guión, y la producción tuvo al cargu d’Ediciones Saltadera.

Nun queixa, un retratu cuntáu del bolo vaqueiro
Idea y testu: Carlos Suari
Locución: Lucía Menéndez
Producción: Ediciones Saltadera, 2016

Be the first to comment

Leave a Reply

Tu dirección de correo no será publicada.


*