Onde la nublina posa

Detalle de la esposición de Michael Kenna nel muséu Evaristo Valle, de Xixón.
Detalle de la esposición de Michael Kenna nel muséu Evaristo Valle, de Xixón.

ALBERTO SUÁREZ
Michael Kenna (Inglaterra, 1953) de mano diba pa cura, pero diose cuenta de qu’aquello nun yera pa él y dexólo y matriculóse na Escuela d’arte de Banburi. Al contactu con disciplines artístiques diferentes, escoyó la fotografía y hasta güei. Kenna ye ún de los fotógrafos más importantes del momentu, un gran trabayador que lleva feches más de cuatrocientes esposiciones en tol mundu , que tien obra colingao en más de cien museos y que lleva publicaos más de venti llibros pa difundir la so grandísima obra.

Gracies al llabor de difusión del arte de la Fundación Muséu Evaristo Valle, pueden vese en Somió (Xixón), hasta’l 3 de setiembre, ventiséis semeyes d’esti autor descomanáu na esposición titulada El pesu l’aire. Una oportunidá única pa disfrutar unes semeyes d’una calidá escelente d’esti poeta de la nublina. Un home que, cámara y trípode al llombu, –per tierra, mar y aire–, esfuérzase en captar la esencia de la naturaleza del planeta obteniendo un resultáu tan serenu y íntimu qu’emociona.

Michael busca y encuentra la densidá más absoluta de lo prieto pegada a lo blanco más puro, nun filín namás (por exemplu en «Lluces nel horizonte», Jeung-do, Xinán, Corea del Sur, 2012), nunos montes, mares, peñes y árboles, onde’l sol ta tapáu poles nubes y la nublina. Onde les formes y los rellumos xueguen a recortase, versu a versu.

Toles fotos que fai revélales el mesmu autor en xelatina de plata a tamañu 20x20cm, porque sigue usando cámares y procesos manuales onde manda y gobierna’l talentu d’el, pa trabayar domando la lluz con esposiciones mui baxes. Esi control, de maestru artesanu, contrasta col usu xeneral de máquines dixitales y grandísimos formatos tan de moda nos museos anguaño.

Nes semeyes de Kenna, l’home, la muyer y los animales suelen tar ausentes, pero nun lo tán les sos intervenciones nel paisaxe, que ye’l protagonista total de la so obra. Na esposición del Evaristo Valle puede tamién consultase y mercase’l catálogu, A twenty year retrospective (2004), una edición percompleta y perguapa, y puede vese un audiovisual sobre’l fotógrafu. Tamién se van facer visites guiaes, a cuenta de Jorge Mola, educador del muséu, los díes 15 de xunetu y 5 y 26 d’agostu.

L’ultimu fin de selmana de xunetu, Nicolás Cancio, va dar un conferencia sobre’l trabayu de Kenna y el mesmísimu autor va tar en Somió pa firmar exemplares el tercer fin de selmana d’agostu, nuna fecha y horariu que ta ensin confirmar. El programa d’actos que complementa la muestra remata’l día 19 d’agostu con un recital de música antigua del Xapón. Esti conciertu va ser tamién nel muséu a las ocho y media la nueche.

Y, amás de la esposición, puede conocese o revisitase la obra imprescindible del pintor xixonés Evaristo Valle y gociar d’un de los xardinos más grandes y importantes d’europa: 16.000 metros cudraos de prau, escultures y árboles centenarios d’especies foriates.

El pesu l’aire. Esposición de Michael Kena
Muséu Evaristo Valle, Somió, Xixón.
Hasta’l 3 de setiembre.

Be the first to comment

Leave a Reply

Tu dirección de correo no será publicada.


*