Pablo Rodríguez Medina gana’l XX Concursu de Cuentos pola Oficialidá de Bimenes

Pablo Rodríguez Medina.
Pablo Rodríguez Medina.

La narración Los restos d’un naufraxu, de Pablo Rodríguez Medina (L’Entregu, 1978), ye la obra ganadora del XX Concursu de Cuentos pola Oficialidá del Asturianu, qu’entama’l Conceyu de Bimenes y que ta dotáu, na primer categoría, con 600 euros. El segundu premiu, dotáu con 450 euros, foi pa Lluis Aique Iglesias Fernández (Sotrondio, 1967), pol cuentu Polly a les puertes del paraísu, mentes que’l tercer premiu, que tien una dotación económica de 300 euros, foi pa la obra Ca tolos vientos, de Llucía Fernández Marqués (Xixón, 1974).

Anguaño, el xuráu formáronlu los escritores Xulio Vixil Castañón, Ana Esther Martínez Sierra y Francisco Álvarez González, amás del alcalde de Bimenes, Aitor García Corte, como presidente, y el técnicu responsable de la Estaya de Cultura del Conceyu, Daniel Cueli Canto, en calidá de secretariu.

La entrega de los premios va facese’l sábadu 2 d’avientu, a les doce y media de la mañana, nel Muséu Casa de les Radios, en Suares (Bimenes). Nesti actu, Pablo Rodríguez va lleer el cuentu ganador del concursu y, darréu, va actuar el monologuista Carlos Alba, que va dar vida al so personaxe más conocíu, Cellero, na interpretación de La llei del cuchu. Alba, amás, vien de ganar el I Premiu Nel Amaro de Teatru profesional n’asturianu y gallego-asturianu, que convoca la Conseyería d’Educación y Cultura.

Be the first to comment

Leave a Reply

Tu dirección de correo no será publicada.


*