Pablo X. Suárez gana la XXIII edición del premiu Xuan María Acebal de poesía

Pablo X. Suárez.
Pablo X. Suárez.

L’escritor Pablo X. Suárez ye’l ganador de la XXIII edición del premiu Xuan María Acebal de poesía, ún de los gallardones lliterarios que concede’l Gobiernu d’Asturies pa obres escrites n’asturianu. El xuráu foi unánime al reconocer el poemariu Little Babilonia como’l meyor de tolos que se presentaron anguaño al certame, que tien una dotación económica de 3.000 euros.

Fernando Padilla Palicio, director xeneral de Planificación Llingüística y Normalización, foi l’encargáu de presidir un xuráu compuestu polos escritores María Ángeles Carbajal Roza –como ganadora de la edición anterior–, Raquel Fernández Menéndez, Ana Isabel Medina Zarabozo, Xuan Santori Vázquez y Xosé Miguel Suárez Fernández. Toos ellos destacaron nel acta «el nivel llingüísticu y estilísticu, y la brillantez de les imáxenes d’un testu que xuega y entemez la tradición más clásica coles referencies más pop».

Al Xuan María Acebal podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que fueren inéditos y non premiaos n’otros concursos.

Pablo X. Suárez (Orviz, Siero, 1981) ye filólogu y especialista en llingua asturiana, amás d’una de les voces más atrevíes y renovadores de la llírica en llingua asturiana. Creador de la Timba Poétika y poeta oral, tien publicaos n’asturianu los poemarios Asturiana Beat (2005) y El sistema débeme una chocolatina (2011), amás del llibru de rellatos Yoni y yo. Escritor tamién en castellanu, tien publicaos nesta llingua los llibros Pop retórika (2010) y Cómo evitar el apocalipsis (2016). Amás, Suárez va publicando Nel blogue Diarios de Yoni tanto les convocatories de timbes poétikes y recitales como delles reflexones, testos orixinales y testos d’otros autores que-y presten.

Be the first to comment

Leave a Reply

Tu dirección de correo no será publicada.


*