‘Paisaxes espirituales’, un trabayu qu’echa abaxo mitos sobre les monxes de la Edá Media

Fachada de la Vicaría del Monesteriu de San Pelayo, Uviéu | Foto: Nacho.
Fachada de la Vicaría del Monesteriu de San Pelayo, Uviéu | Foto: Nacho.

Les investigadores de la Universidá d’Uviéu Raquel Alonso Álvarez, profesora d’Historia del Arte, y Laura Cayrol Bernardo, becaria FICYT, tán participando nun proyectu dedicáu a estudiar cómo yera la vida monástica femenina na Edá Media peninsular. El so trabayu, que lleva’l títulu Paisajes espirituales (Paisaxes espirituales) ta desmontando dellos de los tópicos más estendíos sobre la vida de les monxes nos reinos ibéricos, sobre manera, na Alta Edá Media.

En concreto, el trabayu de les investigadores ascrites a la universidá asturiana céntrase nos monesterios de Santa María de las Huelgas (Burgos) y de San Pelayo (Uviéu), onde, por exemplu, hubo un tiempu que funcionó, al llau de la femenina, una comunidá másculina, la que diba dar empiezu, décades más tarde, al monesteriu de San Vicente. «Anque se conocía que San Pelayo agospió una comunidá masculina al principiu, la conexón con San Vicente nun s’estudiara a fondo hasta la fecha», indica la doctoranda Laura Cayrol.

Yera frecuente que les monxes nun respetaren la clausura. Salíen davezu pa visitar a la familia o confirmar donaciones al monesteriu, y tamién entraben laicos a les zones de recoyimientu.

Según los documentos estudiaos, la convivencia d’homes y muyeres vendría de la necesidá de capellanes que teníen les comunidaes femenines pa la so asistencia sacramental. Nos monesterios más ricos, el númberu d’estos clérigos yera altu y, na práctica, constituíen una comunidá por sí mesmos qu’entraba tamién a les zones de clausura.

La investigación, anque tovía ta en procesu (calcúlase que’l trabayu acabará nel 2017), dio yá frutos interesantes como’l que s’acaba de mentar y que, a xuiciu de les dos estudioses, acaben con creencies falses sobre la relixosidá femenina nos monesterios. Asina, según esplica Raquel Alonso, yera frecuente que les monxes nun respetaren la clausura. «Salíen davezu pa visitar a la familia o confirmar donaciones al monesteriu, y tamién entraben laicos a les zones de recoyimientu», comenta.

Tampoco yera raro que nestos monesterios llegaren a vivir muyeres non relixoses. Raquel Alonso cita, por exemplu, la figura de la domina, una laica perteneciente a la familia fundadora que xestionaba los aspectos económicos del conventu y que llegaba, inclusive, a imponer la so autoridá penriba de la madre abadesa.

San Pelayo como centru del Infantáu n’Asturies

Cayrol destaca, amás, la importancia de San Pelayo como monesteriu de fundación rexa que, a lo llargo de sieglos, tuvo baxo la protección de la monarquía. Tanto, que llegó a formar parte del Infantáu —la manda que recibíen les fíes de los reis llioneses– y nél vivieron delles muyeres del entornu real. La conexón de San Pelayo cola nobleza asturiana sí que la estudiaren profesores como Francisco Javier Fernández Conde o Isabel Torrente Fernández, pero’l papel que desenvolvió como monesteriu real y centru del Infantáu asturianu tien recibío muncha menos atención.

Precisamente, el fechu de que San Pelayo fuera un monesteriu poderosu, onde la intervención laica –real y aristocrática– tuvo un papel fundamental, esplica, a xuiciu de les responsables de la investigación, una cierta relaxación nel respetu de la clausura. «Más que la so condición de relixoses, lo que condicionaba la vida monástica yera, sobre manera, l’estatus social tan altu de les monxes», conclúi Cayrol.

Sicasí, entrambes les dos investigadores precisen que les cuestiones relatives tanto al pocu rigor nel respetu de la clausura como a la cohabitación de comunidaes femenines con colexos de capellanes afecten, sobre too, a les órdenes benedictina y cisterciense y non a les más modernes, como son les franciscanes y dominiques.

El trabayu Paisaxes espirituales ye un proyectu qu’encabeza l’Institut de Recerca en Cultures Medievals (Institutu d’Investigación en Cultures Medievales) de la Universidá de Barcelona y cuenta con financiación del Ministeriu d’Economía y Competitividá.

Be the first to comment

Leave a Reply

Tu dirección de correo no será publicada.


*