Portus, los últimos cien años del puertu d’Avilés

La esposición titulada Portus, una historia del Puertu d’Avilés conmemora’l primer centenariu del órganu de xestión alministrativa de la infraestructura portuaria, la Xunta’l Puertu, nacida en 1916. La muestra, que va tar abierta al públicu na cúpula del Centru Niemeyer hasta’l 10 de xineru de 2016, ye una mirada atrás na historia del puertu avilesín dende la Edá Media –dómina onde se cita pela primer vez nun documentu oficial– hasta anguaño.

Esti viaxe al pasáu empieza nel primer pisu del edificiu, que, pa la ocasión, ta bastante a oscures, entiéndese que pa facilitar la contemplación d’imáxenes retroilluminaes, proyecciones y meses de lluz onde s’enseñen documentos y llibros antiguos. De la qu’empezó l’actividá portuaria, les principales mercancíes que s’importaben yeren el viuo y la sal y les que s’esportaben yeren la llana y la madera. Avilés, daquella, y por munchos sieglos, yera’l principal puertu del reinu d’Asturies y, bien de tiempu, tamién del reinu de Llión. Cerca d’Avilés, nel llugar de Raíces, taba’l castiellu de Gauzón, la edificación más importante del reinu d’Asturies llevantada pa protexese de los ataques d’invasores y pirates vinientes de la mar, nuna zona onde les sableres y arenales inmensos a los dos llaos d’una ría bien fonda permitíen el desembarcu con facilidá.

La villa d’Avilés, pola actividá portuaria y comercial que tenía y pola importancia estratéxica que diba garrando nel reinu, ganó ensiguida la concesión d’un fueru propiu, el Fueru d’Avilés, que protexía l’actividá mercantil y quitaba a los comerciantes avilesinos la obligación de pagar portalgos y portazgos nos tresportes de les sos mercancíes hacia’l sur. Nesta dómina –y hasta hai cuasi cien años–, el puertu taba pegáu a la villa y aprovechaba les condiciones naturales magnífiques de la ría pa guardar l’atraque d’embarcaciones a vela.

Avanzando pelos coenteníos espositivos, dende’l primer pisu de la cúpula pue vese nel suelu de la planta baxa una impresión descomanada d’un mapa de la ría d’Avilés de 1916, onde rescamplen los arenales y marismes que se rellenaron pa construir les árees industriales que l’arrodien anguaño. L’actividá industrial y el crecimientu urbanu de núcleos como Salinas, Raíces y la mayor parte d’Avilés y Llaranes, acabó con un paixase natural que se presume debió de ser impresionante. Una vez más puede vese la dimensión del dañu que l’actividá industrial fixo al mediuambiente n’Asturies nel últimu sieglu.

A partir d’esti puntu, yá na planta baxa, la esposición recupera la historia de les dos márxenes de la ría, y fai recorríu peles infraestructures pesqueres y conserveres, les actividaes d’entiba y desentiba, les empreses de fletes y consignataries, los astilleros y la instalación sucesiva de les industries dedicaes a la producción de fierro, aceru, zinc, aluminiu, cristal, etc., aportando bien de veces más elementos de la cuenta, que se presenten al visitante más apetiguñaos de lo que sería deseable pa una comprensión bona de la información y pa un gociu estéticu mayor.

Portus, una historia del Puerto de Avilés
Cúpula del Centru Niemeyer, Avilés
De miércoles a domingu, de 11:00 a 14:00 y de 16:00 a 19:00 hores
Abierta hasta’l 10 de xineru del 2016

Be the first to comment

Leave a Reply

Tu dirección de correo no será publicada.


*