Primer Festival de Cine LGBTIQ n’Avilés

El sábadu 18 de xunu arranca n’Avilés el Primer Festival de Cine de temática lesbiana, gai, bisexual, transexual, intersexual y queer qu’organiza’l Centru Niemeyer d’Avilés, con un programa de proyecciones y charles que se va estender hasta’l sábadu 25 de xunu. Esti conxuntu d’actividaes –mui cercanes nel tiempu a la celebración del Día del Arguyu LGTB, el 28 de xunu–, tien l’enfotu de facer evidentes les esmoliciones, esperiencies, sentimientos y circunstancies de los colectivos tan estremaos nos que s’agrupa la ciudadanía pola mor de la so identidá de xéneru.

La estaya cinematográfica fórmenla esti añu doce películes de procedencia xeográfica mui diversa, pero que tienen en común la so esploración de los grupos humanos caracterizaos pola so sexualidá non normativa y que, polo tanto, sigue necesitando d’una visibilidá mayor cola fin de despertar la conciencia social. Y ye que pue paecer que la situación de les persones LGBTIQ ta camín de normalizase nes sociedaes occidentales, sicasí, delles reacciones a un socesu como l’atentáu contra una discoteca gay d’Orlando esti mesmu mes –agrupaes munches d’elles baxo la etiqueta #MatarGaysNoEsDelito– faen rescamplar los sentimentos d’homofobia y transfobia que tovía añeren en munches persones –y que, nes circunstancies propicies, puen acabar en crímenes d’odiu–.

Por too ello, el festival avilesín quier non solo apoyar el desenvolvimientu de la cultura y la industria cinematográfica, sinón, sobre manera, favorecer l’alfabetización audiovisual de la ciudadanía y el so sentíu críticu hacia situaciones muches veces silenciaes o qu’asoceden na trestienda de los sos entornos sociales.

El programa ábrese cola proyección, el día 18 a les 18:30 hores, de la película india Margarita, with a Straw, un títulu que va poder vese tamién el domingu 19 a les 18:00 hores. El mesmu sábadu 18, a les 21:00 hores, ta programada la película estaonidense Tangerine, una comedia sobre una una prostituta tresxéneru que, depués de pasar una temporada na cárcel, entérase de que’l mozu tuvo engañándola.

El domingu 19, además de la yá mentada Margarita, with a Straw, a les 21:00 hores va proyectase’l drama inglés The Duke of Burgundy, onde s’esploren les llendes del gustu y del dolor ente una pareya d’amantes lesbianes.

Un tonu mui distintu tien el mediumetraxe arxentín Yo nena, Yo princesa, que ta programáu pal llunes 20 a les 17:00 hores. Nesti documental pue vese’l testimoniu de Gabriela, madre d’una neña trans de cinco años, un documental que, como dicen dende la productora, «enfréntanos coles nuestres idees sobre la vida, sobre lo que tien que ser y, principalmente, sobre lo que ye». De transexualidá trata tamién la otra película que se proyecta’l llunes, nesti casu, a les 20:30 hores: Naomi Campbel – No es fácil convertirse en otra persona. Esti llargumetraxe chilenu cuenta la historia de Yermén, una tarotista que, nel so camín pa consiguir facer la operación de reasignación sexual, conoz a una inmigrante que quier ser igual que Naomi Campbell.

El martes 21 ye’l turnu, a les 17:30 hores, de la proyección de Stories of Our Lives, una película de producción keniata y sudafricana que trata la situación de la mocedá LGTB en Kenia al traviés de cinco histories reales n’escenarios tanto urbanos como rurales. La segunda proyección del día, a les 20:30 hores, ye la de la cinta israelí Barash; esti títulu ye’l nome de la protagonista, una adolescente rebelde que va ver trestocada la so vida al namorase de la so compañera nueva d’institutu.

Al día siguiente, miércoles 22, va proyectase, a les 16:30 hores, la película española Sueñan los androides, una historia ambientada nun añu 2052 apocalípticu, onde una oveya cuesta cuatro millones y mediu de pesetes y hai que gastar munches bales pa poder pagala. A les 19:30 hores va poder vese el documental portugués E Agora? Lembra-Me, onde’l director, Joaquim Pinto, narra la so llucha personal contra’l VIH y la hepatitis C, virus de los que ye portador dende hai cuasi 20 años. Una historia sobre’l tiempu, la memoria y sobre cómo sobrevivir a les espectatives.

El xueves 23 van volver proyectase Barash (17:30 hores) y Sueñan los androides (20:30 hores, sala de cine). A la mesma hora qu’esta última, pero nel auditoriu, ta programáu Te prometo anarquía, un llargumetraxe xermano-mexicanu que trata la historia de Miguel y Johnny, dos rapazos con una rellación abierta que pivota ente l’amistad y el sexu y que se dediquen, principalmente, a facer skate nes cais de México DF y a vender el sangre propio nel mercáu negro.

Te prometo anarquía va volver proyectase’l vienres 24, a les 17:00 hores, nel mesmu espaciu, al tiempu que, na sala de cine, se pue ver Stories of our lives. El viernes va ser un día de munches reposiciones, pos a les 18:30 hores ta programada E Agora? Lembra-Me; a les 19:00 hores, Duke of Burgundy (la portuguesa na sala de cine y la británica nel auditoriu), y, a les 21:30 hores, na sala de cine, Naomi Campbell. Tamién a les 21:00 hores, pero nel auditoriu, va proyectase El branu de Sangaile, una cinta lituana que cuenta’l despertar a la vida de Sangaile, una adolescente apasionada polos aviones d’acrobacies.

L’últimu día del festival, el sábadu 25 de xunu, van reponese les películes Yo nena, Yo princesa (16:30 hores), El branu de Sangaile (17:30 hores) y Tangerine (19:30 hores). La clausura ta prevista pa les 21:00 hores, cola proyección de la cinta Dólares de arena, una producción de México, República Dominicana y Arxentina. Nesta película, Noelí, una moza dominicana, gana la vida a costa de los turistes que branien na playa de Las Terrenas. El mozu de Noelí plania qu’ella marche pa Francia con Anne, una de les sos clientes, y que mande dineru dende ellí, sicasí, los sentimientos de la moza dominicana hacia Anne empiecen a cambiar según se va averando’l momentu de marchar.

Amás de les proyecciones de películes, alredor del festival van organizase otres actividaes, como charles, alcuentros o meses de debate que van promover la visibilización de los colectivos LGBTIQ, asina como la sensibilización de la sociedá en xeneral hacia problemes qu’afecten de manera significativa a estes persones, tal como les rellaciones dientro de la familia, la sexualidá y la discapacidá, la diversidá sexual nos centros escolares o el tratamientu del VIH.

El programa completu pue descargase na páxina web del festival.

Be the first to comment

Leave a Reply

Tu dirección de correo no será publicada.


*