Red Dot: una gala pa homenaxar al meyor diseñu industrial

Esposición Design on Stage, coles pieces ganadores.
Esposición Design on Stage, coles pieces ganadores. | Foto: Red Dot

El 4 de xunetu, el Teatru Aalto de la ciudá d’Essen (Alemaña) acoyó la gala d’entrega de los premios Red Dot, seique’l gallardón de más prestixu nel campu del diseñu industrial. Unes selmanes primero, na primavera del 2016, un xuráu de 41 espertos decidiera cuálos diben ser los productos que diben poder llevar el puntu encarnáu que los acreita como los meyor diseñaos de tola industria. El xuráu concedió’l premiu Red Dot a 1.304 productos, pero namás que 79 algamaron la categoría máxima, el Red Dot: Best of the Best.

La gala foi’l momentu d’honrar non solo a les creaciones ganadores sinón, sobre too, a les persones que les fixeron posibles. Nesti sen, destacó’l premiu Red Dot al meyor equipu de diseñu del añu, un gallardón qu’ameritaron los miembros del Blackmagic Industrial Design Team (Equipu de Diseñu Industrial Blackmagic), con sé na ciudá australiana de Melbourne y que se dedica al diseñu de productos pa la industria cinematográfica de Hollywood.

Gala Red Dot nel Teatru Aalto n'Essen, Alemaña. | Foto: Red Dot
Gala Red Dot nel Teatru Aalto n’Essen, Alemaña. | Foto: Red Dot

Baxo la guía de Simon Kidd, el so cabezaleru, l’equipu de Blackmagic tien desenvuelto productos tanto de maquinaria como de software qu’anguaño úsense na producción de películes en tol mundu, pero tamién na televisión y na publicidá. Les cámares que diseñen, les sos ferramientes d’edición y los sos programes informáticos alcuéntrense en delles de les producciones más taquilleres y más espectaculares visualmente de los últimos años, como The Martian, Mad Max: Fury Road, Furious 7, Avengers: Age of Ultron o Avatar.

L’anfitrión de la gala, Peter Zec —CEO de Red Dot– foi entregando los trofeos a los ganadores de la máxima categoría, ente los que s’atoparon el diseñador xefe de Ferrari, Flavio Manzoni, o’l so homólogu en Philips, Sean Carney. Pel escenariu pasaron tamién dellos de los convidaos de más sonadía, como la lleenda del diseñu automovilísticu Ken Okuyama o’l creador del tren de levitación magnética Transrapid, Alexander Neumeister. Al par de la estaya protocolaria, la gala tuvo tamién una parte cultural, cola actuación de la violinista Beatrix Löw-Beer y el Ballet Aalto d’Essen.

red-dot-fiesta-disenadores
Nueche de los Diseñadores nel Muséu Red Dot. | Foto: Red Dot.

Tres de la gala, la fiesta siguió nel Red Dot Design Museum, asitiáu no que fuera’l complexu industrial Zollverein, n’Essen. Alredor de 1.800 diseñadores, decision-makers y amantes del diseñu tuvieron la oportunidá d’alcontrase, texer redes de collaboración y baillar hasta pela mañana al ritmu que marcó’l DJ Chrissi D!

Al mesmu tiempu, inaugurábase nel muséu la esposición especial Design on Stage (Diseñu n’escena), onde se puen ver tolos productos qu’ameritaron el premiu Red Dot anguaño. Pela so parte, los ganadores del premiu al meyor equipu estrenaron tamién una esposición propia, que, col títulu Creative Video Revolution by Blackmagic Design, amuesa los productos, cásique revolucionarios, que la Blackmagic creó pa la industria del cine y que se caractericen por una calidá material altísima, más que pola so uniformidá visual.

Tolos productos ganadores, clasificaos por categoríes, tán a disposición del públicu na esposición virtual que’l Red Dot tien na so páxina web.

Be the first to comment

Leave a Reply

Tu dirección de correo no será publicada.


*