Reflexones y emociones d’una ‘bicyclist’

Read on the wall (Lleer na muria). Foto: Mario Mancuso.
Read on the wall (Lleer na muria). Foto: Mario Mancuso.

NOELIA GARCÍA RODRÍGUEZ
Cuando en cierta ocasión una persona quixo saber por qué siempre significó tanto pa mi pedaliar sobre dos ruedes, la mio contestación inmediata, espontánea y, aparentemente, obvia foi la siguiente: «a mi la bici muéveme».

Cola bicicleta desplázome, faigo exerciciu físicu y los mios músculos esperecen; pero tamién hai dalgo qu’espabila dientro de mi. La bici encarna, pa mi, muncho más qu’un mediu de tresporte ecolóxicu o un deporte atractivu; yer rara la vez que, de la qu’ando en bici, nun soi consciente del símbolu de llibertá que significó y sigue significando esti inventu qu’evolucionó a partir d’un xuguete y que se pensó, nun principiu, como vehículu namás que pal home.

Nel sieglu XIX, en delles zones de los Estaos Uníos, disponer d’una bicicleta valía-y a una muyer el poder evitar emburriones, miraes ofensives y agresiones verbales sexistes nel tresporte públicu. La bicicleta yera una ferramienta de movilidá individual valiosísima y económica que-y daba independencia y autonomía (anque teniendo qu’aguantar munches crítiques); permitía-y dir sola más allá del barriu onde vivía y propiciaba un cambiu de vestimenta hacia prendes femenines más cómodes.

Muéveme munchísimo pensar que, tovía güei, en países como India, una bici sigue siendo una de les claves pa un cambiu de vida, pal accesu a la educación y garantía d’un futuru meyor; especialmente, pa les muyeres moces. La realidá ye qu’un camín llargu y solitariu cuando se vuelve de la escuela al atapecer pue convertise davezu nun escenariu propiciu pal acosu, la violencia sexual y hasta la muerte de neñes y adolescentes. Volver dando pedales amenorga’l tiempu de vuelta a casa y aumenta la seguridá de les moces en delles zones del mundu; amás d’aumentar les oportunidaes d’atrasar un matrimoniu demasiao tempranu y de siguir la escolarización si la escuela s’alluga demasiao lloñe como pa facer el trayectu a pie.

Otra manera, la bicicleta tamién avera cultures y une persones. El cicloturismu d’alforxes al estilu del que fixeron los Premios Nobel Pierre y Marie Curie na noviada ye una manera maraviyosa d’echar a andar viaxes de recorríu llargu. Por descontao que nun ye fácil, pero produz recompenses grandes y dexa marca. Personalmente, la bici dame sensación de llibertá y con ella he pudi acceder a dellos sitios a los qu’otros vehículos nun me podíen llevar, permitióme acampar en sitios inimaxinables onde dormir debaxo de les estrelles y, como por arte de maxa, llevar el tresportín cargáu d’equipaxe xeneró siempre tonelaes d’hospitalidá ente les persones que me diba cruciando pel camín.

Pa esti tipu d’aventures nun ye indispensable disponer d’una bicicleta carísima, ye abondo con que’l cuadru y las ruedes sían bonos y te dean confianza. Tampoco ye necesario contar con unes cualidaes físiques escomanaes porque ún va poniéndose, a poco y a poco, más fuerte según van trescurriendo los días enriba de les dos ruedes. Lo importante ye tar en forma, dalgo de gustu pol esfuerciu y tener la cabeza nel sitiu. Nun fai falta dicir que llevar un maillot ye más cómodo, pero ye dalgo totalmente prescindible; y, si non, que-yos lo digan a aquellos ciclistes qu’hai cien años facíen rutes de distancies llargues en camisetes de tirantes y vaqueros recortaos.

Si, amás de pedaliar, ún tien amor pola naturaleza, nun hai dulda de que la bicicleta de monte ye la escoyeta perfecta pa combinar entrambes les dos pasiones.

Be the first to comment

Leave a Reply

Tu dirección de correo no será publicada.


*