Ruberval Monteiro: guapura y trescendencia

Anunciación na parroquia de Ntra. Sra. de les Gracies de Sarandi, Brasil.
Anunciación na parroquia de Ntra. Sra. de les Gracies de Sarandi, Brasil.

HENRIQUE G. FACURIELLA
Cuando se piensa en ver arte, a cásique naide se-y vien a la cabeza visitar una ilesia moderna. Por desgracia, la mayoría de los templos llevantaos nos últimos cien años tienen mui pocu interés estéticu tanto na so arquitectura como na ornamentación. Nunos casos, por un minimalismu mal entendíu que deriva en frialdá y, n’otros, pol usu (y abusu) de santos d’escayola o cartón piedra que mueven a too menos a la contemplación. Y ello asocede cuando, na tradición relixosa, se vio siempre na llamada via pulchritudinis (camín de la guapura) una sienda pa entrar en comunión col misteriu.

Sicasí, queden tovía dellos espacios onde esti camín siguió abiertu y con persones que trabayen pa que nun se zarre del too a monte. Una delles ye, ensin dulda, el monxu benedictín brasileñu Ruberval Monteiro da Silva, artista y profesor nel Institutu Litúrxicu Pontificiu San Anselmo, de Roma. Les sos fontes son, claramente, les del arte paleocristianu y de l’Alta Edá Media (tanto oriental como occidental) pero puestes nun contestu y con un llinguaxe contemporáneos que falen con elocuencia a les muyeres y los homes d’anguaño.

A primeros d’esti mes de setiembre, tuvi la oportunidá de conocelu personalmente nes xornaes d’estudiu sobre’l ritu hispano-mozárabe qu’organiza la hermandá Gothia, en Madrid, onde dio una conferencia sobre la representación de la Virxe María na iconografía de los primeros sieglos del cristianismu. Más que’l conocimientu, fondu, del tema que trató, lo que más me sorprendió d’él foi la so actitú a lo llargo de los tres díes que duraron les xornaes, una actitú que combinaba l’atención pa lo qu’asocedía alredor o nel diálogu interpersonal cola contemplación interior, lo que facía que manara d’él una serenidá que podía percibir cualquier persona que lu viera.

Esta atmósfera contemplativa cátase, igualmente, delantre de les sos obres, repartíes principalmente n’ilesies y monesterios de Brasil y Italia. Sía en pintures, mosaicos o vidrieres, los rasgos de les sos figures (formes xeométriques, astros, plantes, animales o persones) ponen al espectador en conexón con dalgo que ta más allá d’aquello que se ve o se toca. Anque’l creyente lo llame Dios y sía quien a poner lo que ve en rellación colo que cree, l’atéu nun va quedar secu énte les formes que salen de les manes de Ruberval y va sentir que-y dicen dalgo, seique rellacionao cola so propia vida o quiciás productu de la so sensibilidá estética.

Dende’l puntu de vista formal, la obra de Ruberval Monteiro destaca polos colores vivos y abondantes —dalgo qu’él atribúi a los sos oríxenes brasileños–, la espresividá tan grande de los rasgos y por un usu consciente y ricu de la simboloxía. Nesti sen últimu, nengún de los elementos que se puen ver nes sos creaciones ta puestu al azar, sinón que toos cumplen una función na tresmisión d’un mensaxe, igual que vieno asociediendo nes materializaciones más altes del arte de tolos sieglos. Asina, por exemplu, una corriente d’agua nun ye solo una corriente d’agua, sinón una manifestación del Espíritu Santu, y les estrelles qu’arrodien tantes figures de Cristu en maxestá nun son puru adornu, sinón la declaración de que’l que ta en mediu ye Señor del Tiempu qu’esos astros ayuden a midir.

En resume, gociu estéticu y conexón colo trescendente axúntense nes manes d’esti benedictín asosegáu y fondu pa tresmitir, baxo la forma d’estrelles, cursos d’agua, páxaros, arcánxeles, muyeres o neños que’l ser humanu ta llamáu a dalgo más allá d’él mesmu y que, a la vez, alcuéntrase no fondero de sí.

Ruverbal Monteiro delantre d'una de les sos obres.
Ruverbal Monteiro delantre d’una de les sos obres.

Be the first to comment

Leave a Reply

Tu dirección de correo no será publicada.


*