Siete espertos n’etnografía van falar en La Puela del mieu, el mal y los remedios pa ellos na sociedá tradicional asturiana

Na Casa Cultura de la Puela Allande va facese’l sábadu 18 de payares y el domingu 19 el XVIII Seminariu d’Estudios Asturianos qu’entama la Fundación Belenos. Esti añu, el títulu d’esta xuntanza, que se fai pa dar a conocer la cultura asturiana, ye «Escontra’l mal: remedios na sociedá tradicional asturiana». Una gran flor d’espertos de primerísimu nivel na tradición oral y na cultura inmaterial asturiana van tar presentes pa tratar aspectos diferentes de les creyencies populares, y de la manera que teníen los nuestros antepasaos d’enfrentase al mal que carecíen les persones o los bienes d’ellos –sobre manera’l ganáu–.

Pal sábadu a les diez de la mañana ta prevista la estrena, cola intervención de José Antonio Mesa Pieiga, Alcalde d’Allande. Media hora depués l’etnógrafu Cristobo de Milio Carrín va falar del conceptu del mal na sociedá tradicional asturiana. A les once y media, el naturalista y escritor Ignacio Abella va dar una charla que se titula «La ñatura escontra’l mal: remedios botánicos y otres práutiques tradicionales». Pa les doce y media va llega-y el turnu a Martín de Villar, que ye etnógrafu y fisioterapeuta y va falar de «curandeiros, compostores y otros sanadores».

De tarde, a les cinco, la palabra va ser pa Xosé Antón Fernández ‘Ambás’ y pa Ramsés Ilesies, etnógrafos y músicos, que van intervenir col tema «El poder de la pallabra: rezos, ensalmos y esconxuros», onde van falar de fórmules que tienen sintío y recopilao per toa Asturies. Pa les seis ta programáu’l turnu de Berto Álvarez Peña, etnógrafu y dibuxante, que va falar de «la enfermedá d’aniciu máxicu».
 Pa rematar una xornada repleta d’intervenciones, va facese, nel Café Centro, un filandón con música del país.

Amparo López, A Bruxa de Brañavara.
Amparo López, A Bruxa de Brañavara.

El domingu, a les once y media, coincidiendo col centenariu del nacimientu d’Amparo López, A Bruxa de Brañavara, va proyectase’l documental A Bruxa de Brañavara» y va falar Berto Álvarez Peña. Tamién se va entamar un alderique con más otros etnógrafos y col públicu. Primero de la proyección, va falar Fredo de Carbexe sobre Amparo López, la última nigromante. Fredo ye autor del llibru Parzamique en Brañavara, un ensayu onde s’acerca a la figura d’esta muyer que vivió en conceyu de Bual, na Sierra da Bobia, y que yera conocida per tol occidente asturianu pola so capacidá pa comunicase colos difuntos y pa dar remedios pa los males y mieos de la xente y del ganáu.


Inscripciones

El plazu p’apuntase a esti Seminariu d’Estudios Asturianos de la Fundación Belenos fina’l 15 de payares. El preciu de la matrícula ye de 30 euros. La organziación tamién da la posibilidá d’agospiase en La Nueva Allandesa con pensión completa –qu’inclúi dende la xinta del sábadu hasta la del domingu too dafechu– y, entós, el preciu ye de 90 euros por persona con matrícula.

La inscripción tien de facese ingresando les perres na cuenta bancaria de la Fundación Belenos y unviándo un corréu a la dirección seminariubelenos@gmail.com col nome y apellíos, teléfonu y corréu electrónicu, xunto cola copia del resguardu del ingresu bancariu. Pue pidise más información nos teléfonos 985244811 y 680114090.


A Bruxa de Brañavara

Gonzali Producciones presentó en 2010 el documental en gallego-asturianu A Bruxa de Brañavara. Con dirección d’Illán Gonzali y con Alberto Álvarez Peña como conductor, esti mediumetraxe recuérdanos que n’Asturies había homes y muyeres que teníen el don de ver a los muertos y falar con ellos.

Be the first to comment

Leave a Reply

Tu dirección de correo no será publicada.


*