Sinfonietta Concertante: trabayu musical a comuña

La Orquesta Sinfonietta Concertante col so director, Gaspar Muñiz | Foto: David Ponce.
La Orquesta Sinfonietta Concertante col so director, Gaspar Muñiz | Foto: David Ponce.

La música ye la espresión artística más efímera porque namás que ye verdaderamente auténtica nel momentu que se produz. Por eso, cada conciertu ye, pa los músicos, una oportunidá única que nun se va volver repetir, onde nun hai opción pa la corrección o pa los arrepentimientos que se pueden dar n’otres espresiones artístiques. Por esti motivu, si en tolos ámbitos de la vida la busca de la escelencia ye un signu de madurez, na música ye un requisitu imprescindible.

Los conservatorios y les escueles oficiales van encaminaes a esti oxetivu, pero la formación de los músicos nestes instituciones ye más como solista que como miembru d’un conxuntu orquestal, cuando la realidá ye que la mayoría va desempeñase profesionalmente dientro d’una orquesta. Pa confirmalo, abonda con comparar el númberu y la distribución horaria de les clases nos currículos de la enseñanza musical reglada.

Hai tres años nació n’Uviéu una formación orquestal que quier suplir esta falta d’hores de trabayu en conxuntu al traviés d’ensayos selmanales, alcuentros y talleres onde los músicos nuevos puen intercambiar duldes y esperiencies con profesores y maestros invitaos. Ye la Orquesta Sinfonietta Concertante, al frente de la que ta Gaspar Muñiz Álvarez, tituláu en Dirección d’Orquesta con matrícula d’honor nes Royal Schools of Music (Escueles Reales de Música) de Londres.

Echar a andar una orquesta nun ye una xera fácil, pero’l trabayu y la constancia a lo llargo d’estos tres años fixo posible pasar d’una plantilla inicial de catorce miembros a la formación actual, con cuasi cuarenta componentes y una temporada de conciertos que’l públicu acueye con un interés cada vez mayor, como se pudo comprobar na temporada pasada, cuando actuaron non solo n’Asturies, sinón tamién en Madrid, con una asistencia que superó les trescientes persones en cada representación.

El repertoriu de la Sinfonietta Concertante abarca del barrocu a la música contemporánea, con una atención especial a la música clasicismu. Bach, Marcello, Händel, Mozart, Haydn o Beethoven, xunto con Debussy, formen el cuerpu principal de la so programación.

El so director, Gaspar Muñiz Álvarez, lleva tola vida lligáu a la música clásica, una carrera qu’empezó na Escolanía San Salvador, primero como escolanu baxo la dirección del maestru Alfredo de la Roza y, tres de la muerte d’ésti, como director del conxuntu vocal a lo llargo de cuasi diez años. Na so formación desempeñaron tamién un papel fundamental los maestros José Sanchís y, sobre manera, Cristóbal Soler, que fuera director del Teatru Llíricu Nacional y col qu’anguaño collabora en calidá de director asistente.

Be the first to comment

Leave a Reply

Tu dirección de correo no será publicada.


*