SUNS va facer d’Údine’l centru de la diversidá llingüística europea

Del 29 de payares al 3 d’avientu, la ciudá italiana d’Údine, nel Friul, va acoyer el festival SUNS Europe, una cita que va axuntar artistes de tol continente européu que trabayen en llingües minorizaes. El festival ye tamién un concursu onde se van premiar les meyores creaciones tanto en música como en cine y lliteratura, unes candidatures que tuvieron hasta’l 5 d’ochobre pa presentase.

El festival SUNS recoyó, de dalguna manera, el testigu del Liet International, el festival européu de la canción en llingües minoritaries y que, l’añu pasáu, nun se fixo por problemes organizativos. Asina, nun ye d’estrañar que, nel apartáu musical, recibieren anguaño 50 cantares candidatos al premiu procedentes de 14 estaos y escritos en 27 llingües minorizaes, ente ellos sardu, sami, irlandés, gallegu o galés. Según informó la organización, los finalistes van anunciase nos próximos díes.

Lorenzo Fabbro, presidente d’Arlef (l’Axencia Rexonal pa la Llingua Friulana, qu’apoya’l festival dende la so fundación), destacó l’éxitu que tuvo la convocatoria l’añu pasáu y cómo, anguaño, recibieron el respaldu del Conseyu d’Europa y de la Rede Europea pa la Promoción de la Diversidá Llingüística. Y ye que SUNS ye, según los sos organizadores, un sitiu pal alcuentru y l’intercambiu ente artistes, idiomes y comunidaes qu’usen les llingües propies pa falar de sí mesmos nun diálogu abiertu a la diversidá cultural. Tal como se remarca na convocatoria, SUNS quier ser una xuntanza de «soníos, visiones, palabres, idees y espresiones d’identidaes qu’existen y resisten, y que se representen d’una manera dinámica y creativa».

El festival coordínalu la emisora Radio Onde Furlane, en collaboración cola sociedá cooperativa Punto Zero, el Conceyu d’Údine y el Teatro Nuovo Giovanni de la ciudá friulana. Amás, SUNS forma parte de la rede EFFE (Europe for Festivals – Festivals for Europe / Europa pa los Festivales – Festivales pa Europa) y cuenta col patrociniu del Conseyu d’Europa y NPLD (Network to Promote Linguistic Diversity / Rede pa la Promoción de la Diversidá Llingüística).

L’añu pasáu, cuando nun hubo nengún representante asturianu nel festival, el premiu del xuráu foi pal dúu suizu Me + Marie (Maria Molin y Roland Vögtli), col cantar en romanche «Hay eu carga».

Be the first to comment

Leave a Reply

Tu dirección de correo no será publicada.


*