Taxi Fabric, diseñu que llega a toles partes

Shilvalini Kumar sentada nun taxi que lleva una de les tapiceríes qu'ella diseña.
Shilvalini Kumar sentada nun taxi que lleva una de les tapiceríes qu'ella diseña.

L’arquitectura de Mumbai (nome tradicional y oficial na India de la ciudá que los europeos llamaron Bombay) mezcla los estilos góticu, victorianu, art decó, indo-sarracenu y contemporáneu. Munchos edificios, estructures y monumentos históricos son de los tiempos coloniales. Shilvalini Kumar quixo crear un diseñu que fuere un homenaxe a l’arquitectura de Mumbai p’acercar los edificios a la vida de les persones d’otres maneres.

Esta diseñadora y ilustradora moza cuenta que’l diseñu nun ta tolo consideráu que debiere y que les coses tienen que dir cambiando, pocoñín a poco, y qu’estétiques nueves tienen que dir ganando espaciu. Por eso ella, depués de decidir dedicase a ser ilustradora y diseñadora, diose cuenta de que’l mayor retu que tenía yera ser quién a trabayar pa la industria y crear soluciones de diseñu que fueren quién a valtar nociones preconcebíes sobre esta disciplina. El segundu desafíu que vio, como-yos pasa a la mayoría de los creadores, yera consiguir topar una voz propia.

taxi-fabric-02 taxi-fabric-03 taxi-fabric-04taxi-fabric-05

Los taxis na India, sobremanera en Mumbai, nun son el tresporte más conveniente pero son un iconu cultural de les ciudaes. A pesar de lo muncho que se molesten con cada taxi los conductores pa destacar frente a los demás competidores, poques idees bones tienen pa los asientos. Los diseños qu’hai de fundes pa cubir los asientos de los taxis son, polo xeneral, sosos y corrientes, ensin nada onde reparar. Amás, el diseñu na India tien y tuvo siempre un alcance y un impactu mui acotáu, nunca tuvo un reconocimeintu grande como un mediu de comunicación nin lleguen a velo bono pa la sociedá. Les xeneraciones más vieyes nun lo entienden, porque’l diseñu pa ellos ye namás visual y nun ye funcional. Nesti panorama nació Taxi Fabric.

Pa Shivalini, Taxi Fabric ye una oportunidá d’espresar el sentimientu que tien por una ciudá qu’ella quier muncho, a la manera d’ella, col estilu gráficu que la caracteriza. Con fuercia, pureza de llinies y colores vivos. Amás, esti proyectu velu «que ta creando un conceyu mui auníu y íntimu pa los diseñadores, onde poder deprender unos d’otros y enteneder qué ye lo que lleva a caún a crear el trabayu que fai tolos díes». Cada trabayu que sal de Taxi Fabric nun ye namás una manera nueva de dase cuenta del pulsu de la ciudá de Mumbai, ye tamién una manera nueva de percibir el pulsu del diseñu. Agora, gracies a esta idea, munchos taxis de la ciudá van cambiando les tapiceríes convencionales por otres enllenes d’arte, de colores y formes, de guapura pa tolos gustos.

Shilvalini Kumar ye una diseñadora mui fina y dedícase tamién a otros campos del diseñu como la creación de marques, logotipos, estuches, envoltorios, revistes, y tipografíes decoratives.

Be the first to comment

Leave a Reply

Tu dirección de correo no será publicada.


*