Txani Rodríguez: Atopase y perdese

Fotografia: Karen Blaha.
Fotografia: Karen Blaha.

La editorial Tres Hermanas estrenó n’ochobre la so colección Tierras de la nieve roja (Tierres de la nieve encarnada), dedicada a la lliteratura en castellanu, cola novela de Txani Rodríguez Si quieres, puedes quedarte aquí (Si quies, pues quedar equí). Si dalgo caracteriza esta obra ye l’ausencia d’una trama fuerte, dalgo que nun ye nengún deméritu, sinón tolo contrario, pos ello permíte-y a l’autora dir filando les emociones y la naturaleza nun tapiz mui ricu en sensaciones.

La protagonista de la novela ye Andrea, una muyer que ta pasando per una situación emocional estrema y a la que la so pareya oblígala a pasar una temporada nuna casa de reposu nel monte. Ellí va coincidir con un grupu de persones tan faltes d’un sentíu na vida como ella mesma y que busquen la felicidá al traviés del descansu y les terapies alternatives. Nesti mediu, onde los animales maten y muerren de continuo, Andrea va sentir l’amenaza de dalgo que, al principiu, nun ye quién a concretar pero que, a poco y a poco, va dir viendo cómo esti desasosiegu tien muncho más que ver con ella mesma que con aquel esterior, otra manera, tan poco amigable.

En Si quieres, puedes quedarte aquí, Rodríguez reflexona sobre l’amor, un sentimientu que tien les mesmes posibilidaes de salvar como de destruir, pos nun ye estraño que, ente’l nome d’amor, s’enrieden les alambres del maltratu, l’abandonu y hasta la mesma muerte.

Nesta historia, la naturaleza ye un personaxe más, lo que l’avera a clásicos de la lliteratura tan importantes como El monte máxicu, de Thomas Mann. Amás, los comportamientos humanos tienen un espeyu nos instintos de los animales, nun xuegu doble que va de la ética al desconocimientu –o la confusión– del bien y del mal.

Txani Rodríguez (Llodio, 1977) ye periodista y escritora, amás de profesora d’escritura creativa na Universidá de Deusto. Si quieres, puedes quedarte aquí ye la tercer novela que publica y con ella quedó finalista del XLVII Premiu Internacional de Novela Curtia Ciudá de Barbastro, ún de los de más sonadía de la narrativa española contemporánea.

Si quieres puedes quedarte aquí. Cubierta.Si quieres, puedes quedarte aquí
Txani Rodríguez
Tres Hermanas, 2016
200 páxines

Be the first to comment

Leave a Reply

Tu dirección de correo no será publicada.


*