Una esposición pa conocer la vide, el vinu y la so ciencia

Vide de la Denominación d'Orixe Protexida Cangas.
Vide de la Denominación d'Orixe Protexida Cangas.

Hasta’l 31 d’avientu pue vese nel Auditoriu Príncipe Felipe d’Uviéu la esposición La vide, el vinu y el CSIC. Dos sieglos d’investigación y que consiste nun recorríu pel pasáu y el presente de la investigación desenvuelta nel Centru Superior d’Investigaciones Científiques (CSIC) alredor de la vide y la producción de vinu.

La esposición, formada por dellos paneles esplicativos –amás de reproducciones en resina de les fueyes y los recimos típicos de delles de les variedaes de vide más característiques de la península ibérica–, arranca cola presentación de la figura del botánicu valencianu Simón de Rojas Clemente y Rubio (1777-1827). Esti investigador foi’l qu’asentó’l primer métodu científicu pa la descripción de variedaes de vide, una disciplina a la que nomó ampelografía (del griegu ἄμπελος, planta de la vide, y γραφή, que traduz como «descripción»).

El métodu de Rojas siguiólu tola comunidá científica internacional y sigue en vigor anguaño; amás, a él débese-y la ordenación y el niciu de la colección de variedaes de vide nes recimales qu’arrodien el Planu de la Flor, dientro del Xardín Botánicu Real de Madrid. Esta institución guarda tamién el so herbariu, que compunxo en 1802, y que ta consideráu el más antiguu del mundu no que toca a variedaes de vide cultivaes.

El recorríu sigue cola esplicación de dellos resultaos concretos que les investigaciones del CSIC producieron en favor del cultivu de la vide, como les que se refieren al control de plagues, la meyora de les cualidaes organoléptiques del vinu, el desarrollu de productos derivaos de la uva o l’aprovechamientu de los residuos de l’agricultura y la industria vinícola pa la obtención de productos con valor añadíu.

Sicasí, la esposición nun se centra namás que nel aspectu científicu de la vide y el vinu, sinón que toca tamién el so tratamientu nel arte y les humanidaes, con una muestra de restos arqueolóxicos, testos bíblicos y árabes, y delles representaciones artístiques.

El CSIC propúnxose, igualmente, sensibilizar al públicu sobre la importancia del patrimoniu vitivinícola español y la cultura arrellada a él, que configuren un sistema únicu nel mundu pola so riqueza de variedaes, de zones de cultivu, de tipos de vinu, de vezos, de preseos, de léxicu y hasta d’arte.

 

Be the first to comment

Leave a Reply

Tu dirección de correo no será publicada.


*