Una visión asturiana del Xapón

Mariscadores en Honmoku, Yokohama.
Mariscadores en Honmoku, Yokohama.

La esposición Asturianos nel Imperiu del Sol Naciente amuesa una vertiente de los fondos del Muséu del Pueblu d’Asturies desconocida pal públicu. Nesti casu, preséntense mediu centenar de les miles de semeyes d’Asia correspondientes al fondu de los Galé que custodia’l muséu. En primer llugar, la muestra resalta’l valir de Juan Galé como fotógrafu aficionáu pero, amás, la esposición va revelar la existencia d’un focu importante de xaponismu y de coleccionismu d’arte xaponés nel norte d’España, únicu pola so conexón cola fotografía.

La posibilidá d’ufiertar el contraste ente los retratos que fai un viaxeru y los qu’él mesmu adquirió nel Xapón de la dómina de l’apertura a Occidente ye, de verdá, única. Les 46 fotografíes propuestes cuenten con un testu curtiu onde s’espliquen los aspectos culturales, sociales o artísticos que tán representaos nelles. El comisariu de la esposición ye Ramón Vega Piniella, miembru del Proyectu d’Investigación «Coleccionismu y coleccionistes d’arte xaponés n’España», que dirixe la Dr.ª Elena Barlés.

 

Tamamura, Mocines maiko (aprendices de geisha) nun xardín de crisantemos. Kioto. Xapón. h. 1900.
Tamamura, Mocines maiko (aprendices de geisha) nun xardín de crisantemos. Kioto. Xapón. h. 1900.

La familia Galé ye l’orixe, fonte y tema central de los materiales que vertebren el proyectu, sobre manera les figures de Jesús T. Galé Pérez (Avilés 1877 – Marsella 1927) y el so fíu Juan Galé Moreau (París 1900 – Lluanco 1975). Los Galé foron viaxeros avezaos y comerciantes y atesoraron una colección espléndida d’obres d’arte y oxetos procedentes d’Asia oriental. Seguramente por iniciativa del segundu, aficionáu a la fotografía, van facer el tour asiáticu con una cámara de fotos a la que van dar un bon usu en tol recorríu.

Al traviés de les semeyes de Juan, «Xan» Galé, los visitantes van ser quién a averase al Xapón más auténticu. Les sos imáxenes trescienden la mirada del turista y nun van a la busca de paisaxes o tópicos idílicos. «Xan» Galé tien conocimientu de la cultura del archipiélagu nipón y busca representar el Xapón tradicional na so transición al Xapón modernu. Xunto a estes fotografíes, espónense una serie d’albúmines de formatu grande adquiríes en Xapón, toes coloriaes a mano y obra de los fotógrafos xaponeses más importantes de les eres Meiji (1868-1912), Taishō (1912-1926) y Shōwa (1926-1989).

Como actividá complementaria a la esposición, entámase un ciclu de conferencies y proyecciones, amás d’editase un llibru electrónicu col catálogu de fotografíes de Xapón del Muséu del Pueblu d’Asturies que pue descargase nel enllaz siguiente:
http://museos.gijon.es/multimedia_objects/download?object_type=document&object_id=147767

Asturianos nel Imperiu del Sol Naciente
Muséu del Pueblu d’Asturies
Del 4 de febreru al 29 de xuno de 2014

Be the first to comment

Leave a Reply

Tu dirección de correo no será publicada.


*