Vallet Montano: memoria de la tresformación del valle de Turón

Trabayos d'afondamientu del Pozu Santa Bárbara en La Rebaldana, 1916. | Foto: Luis Vallet Montano.
Trabayos d'afondamientu del Pozu Santa Bárbara en La Rebaldana, 1916. | Foto: Luis Vallet Montano.

El Muséu del Pueblu d’Asturies, de Xixón, acueye, hasta’l 30 d’abril del 2017, la esposición Paisajes de carbón (Paisaxes de carbón), onde se recuperen les semeyes que la Sociedad Hulleras de Turón encargó, en 1916, al fotógrafu Luis Vallet Montano. Estes imáxenes muestren la tresformación d’un espaciu rural, como yera’l valle de Turón (Mieres) hasta primeros del sieglu XX, n’industrial, una metamorfosis que se produz coincidiendo cola I Guerra Mundial, ún de los momentos de mayor espansión de la minería n’Asturies.

La esposición axunta catorce instantánees de Vallet Montano, toes elles orixinales d’época de formatu grande (40×50 cm), pertenecientes a los fondos del Muséu del Pueblu d’Asturies. Nelles pue vese’l procesu d’afondamientu de pozos y la construcción d’instalaciones y viviendes mineres. Xunto a elles amuésense tamién fotografíes actuales a color, de Roberto Álvarez Espinedo, col oxetivu de que se puea observar l’estáu y l’usu actual de los mesmos espacios que Vallet Montano vio llevantar.

Luis Vallet Montano (Madrid 1858 – ¿Uviéu?, h. 1940) foi un fotógrafu profesional d’orixe francés. Al principiu de la so carrera profesional instalóse en Biarritz y, en 1905, en Bilbao pa exercer como arquitectu municipal d’Irún. Na segunda década del sieglu XX tresllada l’estudiu a Madrid y, en 1913, llega a Asturies, onde abrió un estudiu primero en Xixón (Photo-Rapide), enantes d’instalase dafechu n’Uviéu, onde diba residir hasta finales de los años 30.

Be the first to comment

Leave a Reply

Tu dirección de correo no será publicada.


*