Vanessa Gutiérrez gana’l premiu d’ensayu Máximo Fuertes Acevedo

Vanessa Gutiérrez. | Foto: Costa.
Vanessa Gutiérrez. | Foto: Costa.

L’ensayu El paisaxe nuestru, de la escritora y periodista Vanessa Gutiérrez, ye la obra ganadora de la XXII edición del Premiu «Máximo Fuertes Acevedo», que concede la Conseyería d’Educación y Cultura. Con una dotación de 3.000 euros, a esti gallardón podíen presentase obres de temática, xéneru y estructura llibres que reunieren les característiques del xéneru ensayísticu entendíu na so amplitú.

El director xeneral de Planificación Llingüística y Normalización, Fernando Padilla Palicio, presidió’l xueves 10 de payares la reunión del xuráu, que tuvo tamién integráu polos escritores y investigadores Luis Casteleiro Oliveros, José Ángel Gayol, Marta López Fernández, Elena de Lorenzo Álvarez y Xosé Miguel Suárez Fernández.

Ente les obres presentaes, el xuráu decidió por mayoría conceder el gallardón a la titulada El paisaxe nuestru, que Gutiérrez presentó col seudónimu Recusa Paigona. Nel acta, el xuráu reconoz «el pulsu lliterariu del testu y la modernidá d’una estructura onde se fai dialogar a testos escritos y orales de dómines estremaes alredor d’un mesmu paisaxe».

Vanessa Gutiérrez (Urbiés, Mieres, 1980) ye escritora y periodista. Foi redactora del selmanariu Les Noticies y presentadora de programes de televisión como Pieces, amás de collaborar davezu como articulista nel diariu El Comercio. Autora, con Beatriz Redondo Viado, del ensayu El país del silenciu (2007), Gutiérrez destaca como la voz poética más potente de la so xeneración, una voz espresada nos poemarios Onde seca l’agua (2003), La danza de la yedra (2004) –col que llogró’l Premiu «Teodoro Cuesta»– y La quema (2011) —n’edición billingüe n’asturianu y castellanu—. Como narradora publicó Les palabres que te mando (2006) y La cama (2008). Parte de la so obra ta traducida al catalán, al gallegu, al inglés, al checu, al francés y al húngaru, y recoyida en delles antoloxíes y revistes.

Be the first to comment

Leave a Reply

Tu dirección de correo no será publicada.


*