Xixón dedíca-y una esposición al escritor Vicente García Oliva

Vicente García Oliva.
Vicente García Oliva.

El Centru de Cultura Antiguu Institutu, de Xixón, va acoyer, del 8 de payares al 19 d’avientu, la esposición Vicente García Oliva, un paisanu con munchu cuentu, que quier ser un recorríu pela vida y la obra d’esti escritor xixonés.

La muestra fórmenla los trabayos que, sobre la figura de García Oliva, fixeron los escolinos y les escolines de dellos centros educativos de Xixón, como les escueles públiques Asturias, Evaristo Valle, Jacinto Benavente, Manuel García Blanco, Río Piles y Santa Olaya, o’l centru concertáu San Lorenzo.

Les persones que la visiten van poder conocer y disfrutar con personaxes y obres lliteraries que yá son historia na lliteratura infantil y xuvenil. Asina, la bruxa Pumarina y el dragón Maragatu van dar la bienvenida a esti reinu los silentes tan particular, una muestra que, como dicen dende la organización, «vien mui a cuentu».

Vicente García Oliva (Xixón, 1944) ye un escritor de referencia nes lletres asturianes. Profesor y académicu de númberu de la Llingua Asturiana, ye autor d’una de les sagues xuveniles que más influencia tuvo tanto nos llectores como nos escritores n’asturianu: Fontenebrosa, una triloxía ambientada nun mundu imaxinariu que bebe de les fontes de la novela fantástica universal. Sicasí, el llabor de García Oliva va más allá de la lliteratura infantil o xuvenil, y ente los sos más de venti llibros publicaos hai tamién novela negra o ensayu, como ye’l casu de La vida de siempre o El síndrome de Scherezade, col que ganó’l Premiu d’Ensayu «Máximo Fuentes Acevedo» del añu 2010.

Be the first to comment

Leave a Reply

Tu dirección de correo no será publicada.


*