Xornaes d’Acordionistes en Grau, con munchu fuelle

Na capiya Los Dolores de Grau va estrenase’l día 6 de payares una esposición d’acordiones de Felipe Rubial en collaboración cola Asociación Valentín Andrés. La muestra, qu’entama l’Ayuntamientu de Grau y el Muséu Etnográficu, va poder vese hasta’l 11 d’avientu. La colección tien unos ochenta acordiones –dalgunos con más de cien años– fechos n’Alemaña, Rusia, Inglaterra, Italia, Francia, Suiza, Austria, Estaos Uníos y España. Felipe Rubial –nacíu en Toreno, nel altu Sil, anque vecín de Grau dende va munchos años– empezó a axuntar acordiones va pa venti años y, amás de restaurar estos instrumentos, tamién ye intérprete.

En programa de les primeres Xornaes d’Acordionistes en Grau ta señalada pal sábadu 11 de payares la charra «L’acordión: música los pueblos», del músicu y musicólogu quirosanu Luis Álvarez Pola. Va facese na casa cultura de la villa moscona a les seis y media de la tarde y, dempués, van tocar un conciertín. El sábadu siguiente, pal 16, en mesmu sitiu y hora hai conciertu de Norberto Magín. Amás, pal sábadu 25 de payares, los músicos de Grau van face-y un homenaxe a Pepe Lueje dientro d’estes xornaes y los escolinos del conceyu de terceru a sestu van tener talleres didácticos que va impartir Felipe Rubial y van visitar en grupu la esposición.

L’acurdión ye un instrumentu mui popular n’Asturies, especialmente pel centru y l’occidente’l país. Anque s’inventó en Viena en 1829, ensiguida s’espardió per toa Europa y América. Col acordión llegaron a los pueblos asturianos ritmos nuevos a lo agarrao, como’l valse, pero tamién valió pa tocar pieces tradicionales populares a lo suelto.

Be the first to comment

Leave a Reply

Tu dirección de correo no será publicada.


*