Xovellanos nel Muséu d’Asturies

Ún de los salones de la planta noble del palaciu, magníficu, que l’arquitectu Manuel Reguera llevantó xunto a la catedral d’Uviéu en 1767 pa Pedro Velarde acueye dende l’añu 2000 una escoyeta de pieces que permiten trazar un bocetu firme del arte español nel Sieglu de les Lluces y preparen, amás, la transición hacia la centuria siguiente, significada simbólicamente cola presencia habitual del retratu de Fernando VII y María Cristina de Borbón paseando por los jardines de Aranjuez, oleu firmáu en 1832 pol so pintor de cámara, Luis de la Cruz y Ríos. Asina, esta unidá temática, de creación y conformación más tardía que les dedicaes a revisar l’arte barrocu (principalmente cortesanu) y el sieglu XIX español, viose arriquecida progresivamente a partir de la incorporación d’una de les obres fundamentales qu’integren la colección: el retratu de Xovellanos pintáu por Goya propiedá del Estáu español gracies a la dación de la empresa asturiana Hidroeléctrica del Cantábrico, que liquidó de manera exemplar les sos obligaciones fiscales.

Esi mesmu ámbitu espositivu foi’l qu’escoyeron los responsables del muséu pa entamar una muestra conmemorativa del bicentenariu de la muerte del principal ilustráu asturianu: Melchor Gaspar de Xovellanos (Xixón, 1744 – Veiga, 1811). Pa cumplir col llabor, quíxose más facer una reflexón a partir de los oxetos conservaos esclusivamente na colección del centru. Xunto a los llenzos, la mayoría de formatu medianu, instalóse un bon númberu d’escultures d’interés y categoría estremaos, executaes en bronce, mármole, madera y latón, xunto a delles estampes, lloza (y otres manufactures), llibros, dibuxos y hasta una fotografía y un xuegu d’armes d’época.

Be the first to comment

Leave a Reply

Tu dirección de correo no será publicada.


*