Xuan Santori gana’l Máximo Fuertes Acevedo d’Ensayu

Xuan Santori.
Xuan Santori.

L’escritor y investigador Xuan Santori Vázquez ye’l ganador del XXIII Premiu Máximo Fuertes Acevedo d’Ensayu n’asturianu, que convoca la Conseyería d’Educación y Cultura, pola obra 42.553: depués de Buchenwald. A la hora de conceder el premiu, el xuráu tuvo en cuenta «el xuegu de ficción y realidá que l’autor consigue al traviés de la xuntura d’imaxe, testimoniu y documentación», amás de la «dimensión internacional» presente na obra ganadora.

Xuan Santori Vázquez, doctor en Filoloxía, ye una de les voces más personales de la lliteratura asturiana, amás d’autor d’estudios mui destacaos sobre la producción lliteraria recién n’asturianu y sobre’l desarrollu, normativización y normalización de la llingua asturiana. Nesta estaya, tien publicao títulos como Milenta voces. Visiones del Surdimientu (2006) o El Surdimientu y la lliteratura asturiana: normalización y estandarización (2013).

Como poeta diose a conocer en 1998 col llibru Zunes, al que siguieron los poemarios Les inconveniencies de la especie, Bis a bis y Según cumple’l día, mentes qu’en prosa ye autor de los volumes La heredá y La fábrica de lluz. En cuantes al reconocimientu del so llabor, recibió los premios de poesía Teodoro Cuesta y Elvira Castañón, y, en dos ocasiones, el Premiu de la Crítica d’Asturies.

El Premiu Máximo Fuertes Acevedo ta dotáu con 3.000 euros y a él pudieron presentase obres de tema, xéneru y estructura llibre qu’axuntaren les característiques del xéneru ensayísticu, entendíu ésti en tola so amplitú. Polo que se refier al xuráu, anguaño compunxéronlu’l director xeneral de Planificación Llingüística y Normalización, Fernando Padilla, como presidente, y los escritores y investigadores Luis Casteleiro Oliveros, María del Pilar Fernández González, Elena de Lorenzo Álvarez y  Vanessa Gutiérrez, que fuere la ganadora de la edición anterior con El paisaxe nuestru.

Be the first to comment

Leave a Reply

Tu dirección de correo no será publicada.


*