Xulio Arbesú algama, pela tercer vez, el Xosefa Xovellanos

Xulio Arbesú.

L’escritor Xulio Arbesú acaba de ganar el Premiu Xosefa Xovellanos de novela n’asturianu, que convoca la Conseyería d’Educación y Cultura, cola novela histórica El valor del Rei. Esta ye la tercer vez que l’autor de L’Entregu se fai con esti premiu, ún de los de más prestixu de les lletres asturianes. La primera foi nel añu 2002 gracies a la novela Potestas —ambientada na dómina del conde Gonzálo Pelaez y l’obispu Pelayo d’Uviéu–, mentes que la segunda foi nel 2007 cola obra El pisu d’enriba.

Nel acta de concesión del premiu, el xuráu destacó de la novela d’Arbesú «l’ambientación, que s’avera a una dómina histórica mala de recrear y que consigue espeyar la vida nel sieglu VIII de forma verosímil». Amás, nel acta califícase la obra de «novela coral», onde l’autor resuelve «con gran aciertu» la convivencia de tres voces narratives que se van dando pasu a lo llargo del testu.

El xuráu encargáu de valorar les ocho obres finalistes presidiólu’l director xeneral de Planificación Llingüística y Normalización, Fernando Padilla, y actuaron como vocales los escritores Paco Álvarez, Pilar Arnaldo, José Luis Rendueles y Xosé Nel Riesgo, a los qu’asistió l’asesora técnica del Serviciu de Planificación Lingüística y Normalización, Juncal García, en calidá de secretaria. A esti premiu, dotáu con 3.000 euros, podíen presentase noveles de tema, xéneru y estructura llibres escrites n’asturianu y con una estensión mínima de 75 páxines, siempre que fueren inédites y nun se premiaren n’otros concursos.

Xulio Arbesú (L’Entregu, 1957) ye ún de los narradores de más sonadía del panorama lliterariu asturianu d’anguaño. Amás d’una estensa obra narrativa, onde destaquen les obres mentaes arriba, l’autor abordó con éxitu’l xéneru ensayísticu, como muestren los dos testos ganadores, nos años 2009 y 2012, del premiu d’ensayu Máximo Fuertes Acevedo: El destín treshumanu y Los deseos del dineru. Arbesú tamién se dedica a la composición musical —ye autor, por exemplu, del tangu «La lloca», col qu’Anabel Santiago ganó, anguaño, el Premiu al Meyor Cantar n’asturianu— y a la realización cinematográfica.

Be the first to comment

Leave a Reply

Tu dirección de correo no será publicada.


*