Confín con fin ye un proyectu solidariu qu’echó a andar la tienda y galería uviedína 451shop p’ayudar a les persones que más lo necesiten mientres la crisis sanitaria del COVID-19. Trátase d’una esposición colectiva virtual onde’l cien por cientu de lo que se saque al vender les obres d’arte va dase al bancu d’Alimentos d’Asturies, una organización ensin interés de llucrase, que la xestionen voluntarios namás, y que tien d’oxetivu principal lluchar pa que nun se pierda y se tire la comida, y facer por quitar les fames y la nutrición mala n’Asturies. Anguaño esta entidá trabaya con 192 entidaes sociales que cubren les necesidaes d’unes 27.000 persones.
Na web de la exposición tán a la vista les obres (la mayoría yá vendíes o acutaes) que les y los artistes dieron de manera desinteresada pa sofitar esta causa que 451shop considera tan importante y necesaria. Colos hashtags #confinconfin, #asturiasresiste y #artecontraelcovidasturias va poder facese siguimientu de les obres que formen la esposición nes redes sociales de 451 y del Bancu d’Alimentos d’Asturies, y tamién dar difusión a la iniciativa pa que puea llegar a cuanta más xente meyor.
La esposición virtual compónenla más de 80 obres, con un importe de venta a partir de 18 euros, y ente elles hai pintura, fotografía, collage, dibuxu, grabáu, serigrafía, ilustración, cerámica y otres disciplines artístiques. N’acabando l’estáu d’alarma, van mandase a los compradores les pieces vendíes. Amás, cada selmana van dir amestándose obres nueves a la esposición virtual, polo que la organización recomienda visitar la páxina con regularidá pa poder ver l’arte nuevo.
Esta iniciativa contó col sofitu de la comunidá de creadores asturianos. Artistes, diseñadores, artesanos, tatuadores, ilustradores o artistes formaos na Escuela d’Arte d’Asturies tán implicaos nesti proyectu solidariu necesariu. Nomes propios como Miguel Galano, María Álvarez, José Santamarina, Elena Rato, Juan Díaz-Faes, Nicolás Cancio, Mabel Lavandera, Juan Fernández Álava, Sara Ezquerro, Juan Falcón, Charo Cimas o Ricardo Villoria son dellos de los creadores que cedieron obres.
En palabres de los organizadores, «el colectivu artísticu tien demostrao de siempre’l valor de la solidaridá, cosa que vuelven demostrar cola aportación desinteresada d’ellos, y que tien más valor tovía, cola situación tan precaria que ta viviendo’l mundu del arte y la cultura, sectores mui fráxiles que van a ser de los que más entarden en recuperase depués d’esta crisis». Por esti motivu, tanto dende 451 como dende’l Bancu d’Alimentos d’Asturies tan peragradecíos.
Leave a Reply