El periodista Damián Barreiro va presentar, el sábadu 30 de payares, a les 18:00 hores, el llibru Asturploitation, col que ganó, nel 2018, el XXIV Premiu d’Ensayu «Máximo Fuertes Acevedo». La cita va ser nel Salón d’actos de la Biblioteca Xovellanos de Xixón y l’actu va contar cola intervención del cineasta asturianu Pablo Quiroga Prendes.
Nes páxines d’Asturploitation, Barreiro fai un repasu al papel del cine y la televisión na construcción de les identidaes nacionales o étniques y apurre exemplos pa construir un sistema audiovisual asturianu qu’espeye, con una visión propia –y al traviés de les llingües propies del país–, la forma de vida de la sociedá asturiana.
Barreiro apunta nel so ensayu pa cómo, «pasín a pasu, les diferentes comunidaes culturales del planeta construyeron un audiovisual propiu p’asina nun tener que mirar el mundu al traviés de los güeyos de Hollywood. Series televisives y películes onde los protagonistes viven les trames dientro d’un espaciu que tien xeografía, llingua, alministación, tradiciones, fiestes, símbolos, problemes, actividá económica y equipos deportivos propios; un modelu de sociedá basáu na cultura propia y onde’l territoriu desempeña un papel contestual al ser l’escenariu de l’acción», y defende qu’Asturies «nun pue siguir dando’l llombu» a un preséu tan importante pa reconstruir la so identidá como ye la producción audiovisual.
Damián Barreiro ye periodista y, como tal, trabayó n’Asturies.com, el selmanariu Les Noticies y na Televisión Local de Xixón, amás de collaborar col periódicu Diagonal Asturies, La Nueva España y otros medios de comunicación asturianos. Actualmente trabaya na axencia de noticies Europa Press. Tien publicao los llibros L’espeyu onde miranos (Premiu d’Ensayu Fierro Botas), Yo, la to llingua, y Caleya Sésamu, col que llevó tamién el premiu Máximo Fuertes Acevedo hai cinco años.
Encontré buenas publicaciones aquí. Me encanta tu forma de describir. ¡Agradable!