ALBERTO SUÁREZ
El paisaxe ye’l protagonista de la obra del fotógrafu Diego Airborne. Un paisaxe onde la naturaleza col tol so esplendor y fuercia sotripa cada estampa. Tien predilección poles tierres europees del Atlánticu norte: Asturies, Galicia, Escocia y Irlanda son escenarios frecuentes nel so trabayu. Monte y mar. Mares que son montes y agües tierra adientro. Caminos que lleguen a la fin del mundu, piedres, peñes, colores verdes, grises y marrones. Nublina y l’esplendor moráu d’un cardu en flor.
Diego ye un tímidu y por eso s’escuende tres de la cámara pa nun molestar a la naturaleza que tanto respeta y que tan bien sabe captar, p’aceptar d’ella un monólogu pal qu’él atiende y ella nun abocana. Diego ye ún d’esos fotógrafos que nun se tien por tal porque nun ye quién a comprender la dimensión del resultáu del so trabayu, y esa situación nun se da por inorancia, dase por humildá.
La trayectoria de la obra d’Airborne enseña una evolución dende les semeyes mui postproducíes a unos impactos frescos y realistes. Y, nesi camín, el so catálogu de fotos cambió muncho y siempre pa meyor, publicando con una mirada más escoyida, cenciella y callada.
Galería Flickr de Diego Airborne.
Leave a Reply