Kely (Uviéu, 1960-2013) foi una pintora que desendolcó una trayectoria entera apegada na mayor parte a un rexistru astractu onde’l xeitu, la mancha y el signu de los cuadros primeros de finales de la década de 1990 abrieron pasu a unes obres, les últimes, nes qu’apaez un universu pobláu por formes que tán instalaes nun estáu d’ingravidez y suspensión permanente. Un preciosismu formal emparentáu col Art Nouveau carecterízales tamién, y a la vez un aire oriental, tanto nos motivos qu’usa como no que se refier a la manera de facer les composiciones de les obres, siempre descentraes y asimétriques.
La exposición que-y dedica pa esti final d’añu’l Museu de Belles Artes d’Asturies ta enfotada en revisar los años últimos de producción artística de Kely, enseñando unes obres nes que la pintora ta somorguiada nel zen, del que s’empapó del too depués d’entrar na comunidá Daidoji, el Templu del Gran Camín, y onde col tiempu llegó a facese monxa zen col nome d’Hishiryo. El metese de pleno nesa vía de conocimientu del ser y de la naturaleza y na meditación ta claro qu’influyó sobremanera na forma de crear de Kely, tanto nel planu teóricu y conceptual como a nivel formal.
La esposición Hishiryo. Siempre ye agora. Pintures últimes de Kely va tar nel muséu asturianu ente’l 28 de payares y el 23 de febreru del 2020, na planta -1 del Edificiu l’Ampliación. La muestra axunta cuadros, dibuxos, exercicios caligráficos, coses de l’artista y aperios pa pintar que tienen una influencia oriental total. Les obres son de la familia de Kely y de dellos coleccionistes particulares.
Hishiryo. Siempre ye agora. Pintures últimes de Kely
Muséu de Belles Artes d’Asturies
Hasta’l 23 de febreru del 2020
Leave a Reply