Gerald Bloncourt (1926-2018) nació n’Haití, lluchó pa que cayere’l gobiernu, tuvo qu’esilase y marchó a vivir colos probes en París, y, siendo pintor y grabador, movióse pel mundu como fotoperiodista pa retratar les condiciones de vida de los que menos teníen. Tamién tuvo en 1974 na Revolución de los Claveles y en 1976 na guerra’l Saḥara documentando la ocupación de Marruecos. Trabayó pa munchos medios de comunicación retratando los conflictos sociales. La llucha contra’l fascismu y la denuncia de los abusos venía-y a Bloncourt de raza. Foi un gran activista cultural y políticu.
En Portugal tuvo tamién primero, a partir de los años cincuenta, retratando per Oporto, Lisboa y la parte de Chaves. Tamién fixo un gran trabayu documental siguiendo les rutes de los emigrantes portugueses a Francia y de los poblaos de chabolos onde teníen que vivir al llegar. La emigración portuguesa a Francia foi la más importante na metá segunda del sieglu venti, arrastrando a casi 750.000 persones hasta 1975. La esposición Por uma vida melhor, qu’entamó’l Muséu Colección Berardo, enseñó nel añu 2008 cincuenta semeyes sobre esti trabayu valiosu de Bloncourt, que retrataba’l fenómenu migratoriu de miles de portugueses que queríen prosperar y que nel país d’ellos nun podíen porque les tierren yeren d’amos terratenientes y porque l’Estáu nun invertía en modernizar la industria, comíu poles guerres coloniales. Primero, na década de los cincuenta, emigraron de manera illegal los homes, nunes condiciones mui dures. Depués de los años sesenta, Francia yá collaboraba permitiendo la regularización de los trabayadores y, entós, la emigración medró y llegó tamién a les muyeres, los neños y los vieyos.
La colección de semeyes d’esti fotógrafu caribeñu llega a les 200.000 imaxes. Foi un home reconocíu y premiáu, y diéron-y la distinción de Caballeru de la Orde de les Artes y Lletres de Francia nel 2001, Caballeru de la Lexón d’Honor nel 2015, y tamién lu condecoraron nel 2016 en Portugal cola Gran Cruz del Infante Don Henrique.
Leave a Reply