El xuráu del II II Premiu «Nel Amaro» de Teatru Profesional n’asturianu y gallego-asturianu decidió, por mayoría, que la meyor de les cuatro producciones finalistes ye Hansel y Gretel, de la compañía Higiénico Papel. Según reza nel acta del fallu, el xuráu emponderó la sensibilidá, l’humor y l’inxeniu d’esta adaptación del cuentu clásicu, «onde se mecen los personaxes del cuentu colos de la obra y los intérpretes, nun xuegu metateatral cenciellu y brillante». L’acta tamién destaca’l «procuru llingüísticu» del testu asturianu, un llabor del que foi responsable Xuan Costales. El xuráu señaló tamién la calidá tan grande de toles obres fianalistes, lo que fixo mui complicao llegar al veredictu.
Nesta edición del certame, el xuráu encargáu de valorar les obres finalistes presidiólu’l director xeneral de Planificación Llingüística y Normalización, Fernando Padilla Palicio, y formáronlu Eva Vallines Menéndez, actriz y crítica teatral; Esther Castro Manzano, responsable del Serviciu de Normalización Llingüística de Siero; Cristina Muñiz Martín, escritora; José Ramón Iglesias Cueva, secretariu de l’Academia de la Llingua Asturiana, y Roberto Corte Martínez, director y críticu teatral.
Hansel y Gretel, baxo la dirección de Laura Iglesia, recrea una visión mui personal del clásicu de los hermanos Grimm y muestra lo poco que se necesita pa poder crear mundos onde l’únicu tope ye la imaxinación. Félix Corcuera, Carlos Dávila y la propia Laura Iglesia son los actores qu’interpreten los personaxes d’un espectáculu pa tola familia, onde los más pequeños descubren una forma diferente y cercana de vivir una historia y los adultos recuerden con señaldá los momentos de la infancia cuando los cuentos yeren la puerta principal pa vivir otros mundos.
Al Premiu Nel Amaro, dotáu con 6.000 euros y una pieza artística, podíen concurrir empreses del sector profesional dedicaes a la producción y representación d’espectáculos teatrales, que podíen presentar tanto montaxes orixinales como obres dramátiques yá existentes y versiones o adaptaciones de títulos representaos orixinalmente n’otra llingua. Anguaño, xunto col Hansel y Gretel d’Higiénico Papel, llegaron a la fase final los espectáculos Aire, de Producciones Nun Tris; Garráime, que lu mato o la lloca hestoria d’Asturies, d’Escenapache, y Disculpe, caballeru, de Zig Zag Danza.
Leave a Reply